El Grupu Epona llibera cuentos y dos llibros pa la reciella

Cola fin de facer más llevadera la cuarentena a la reciella y a les families, el Grupu Epona tien lliberaos dellos llibros y cuentos. Éstos pueden lleese y descargase de baldre na web d'esta editorial.

Les histories 'L'esguil músicu', 'El suañu la mazana', 'Yule', 'Los gatinos ecoloxistes', 'La xanina que deprendió andar en bicicleta', 'El magüestu, la xana y el trasgu', 'La casina trabayadora' y 'El salgueru' foron los primeros que se pudieron consultar na páxina web nueva del Grupu Epona. Éstos formen parte del volume 'Cuentos pa que suañes'', espublizáu nel 2003.

Darréu la editorial xubió 'Mitoloxía pa la reciella' y 'Llara quier ser astrónoma', nesti casu pa la so descarga de baldre. Pa los padres, mentes, tamién llibera 'Poética de muyeres', antoloxía asoleyada nel 2014.