Esti xueves ye 17 de marzu, San Patricio, una festividá que se celebra en tol mundu. Tamién n'Asturies, onde ta la única capiella dedicada al santu patrón d'Éire en tol Estáu. L'edificiu asitiáu en Pancar illumínase de verde, al igual que la torre medieval de Llanes. Mentes, en Manhattan va desfilar El Penedón.

El Gobiernu quier organizar l'área central del país al traviés d'un consorciu qu'axunte a 29 conceyos. Busca asina recuperar el proyeutu de la Ciudá Astur, zona qu'ocupa'l 29 por cientu de la superficie d'Asturies y na que vive'l 80 por cientu de la población.

Los Berrones, Marisa Valle Roso y Jerónimo Granda son dalgunos de los artistes participantes nel tributu al músicu cubanu, que va actuar en Xixón n'abril.

Dambes formaciones presenten una proposición non de llei pa que la Xunta Xeneral sofite la Querella Arxentina contra'l franquismu por xenocidiu siguiendo'l mesmu camín que los parllamentos de Catalunya, Euskadi y Andalucía. Esti vienres va aldericase en Plenu.

L'Estudio de Filología Aragonesa (EFA) decidió nun sumase, tres una votación axustada, al procesu qu'anició'l Gobiernu d'Aragón. Trés llingüistes de consensu espertos en "codificación y estandarización de les llingüas romániques" van encargase del llabor.

Ventiún chigres d'Asturies y trés de Madrid, Toledo y Monforte de Lemos lleguen a la final del popular concursu maliayu.

Pola alvierte de que'l sector ta cerca del colapsu énte l'ausencia d'iniciatives que fomenten la quema de mineral llocal.

El direutor xeneral de Minería y Enerxía tornó a encamentar ayeri al Gobiernu estatal pa qu'articule con urxencia un mecanismu que dea prioridá al consumu de carbón autóctonu. Isaac Pola acusó al Executivu en funciones d'incumplir el documentu 'Marcu d'actuación pa la minería del carbón y les zones mineres nel periodu 2013-2018' al nun habilitar un dispositivu alternativu al de restricciones por garantía de suministru, vixente hasta'l 31 d'avientu del 2014.

Somos Siero presenta una moción pa la creación d'una ordenanza sobre l'usu del asturianu nel conceyu. Treslladóla'l mes pasáu al restu de grupos municipales y va tratase nel Plenu previstu pal 31 de marzu. "Queremos normalizar lo que ye normal", afirma'l so voceru Javier Pintado.

Esti sábadu celebróse n'Uviéu una sesión de la Biciescuela d'Asturies ConBici. Neños y neñes pudieron participar nuna clase de nivel 0 que punxeron los voluntarios d'esti coleutivu en La Florida. N'abril habrá dos más, una d'elles en Xixón.