La Xunta Xeneral sofita la Querella Arxentina colos votos en contra de Foro

El Partido Popular astúvose.

La proposición non de llei pa que la Xunta Xeneral sofitara la Querella Arxentina contra'l franquismu por xenocidiu, presentada de forma conxunta por Podemos y Izquierda Xunida, salió alantre na votación celebrada na sesión plenaria del vienres gracies a los votos de la FSA-PSOE y de Ciudadanos. El PP astúvose y Foro foi la única formación que votó en contra.

"Les dictadures condénense toes y non namái dalgunes. Y les sublevaciones, les represiones y los crímenes lo mesmo; lo demás ye cinismu, demagoxa, afán de provocación y maniqueísmu”, argumentó la diputada Carmen Fernández na Xunta Xeneral. "¿Por qué nun condenamos tamién la sublevación socialista del 1934, bien conocida n'Asturies, cola Universidá y la Cámara Santa mui cerca d'equí, como testigos de cargu d'otru golpe d'Estáu?", entrugóse.

Cuartu país en sofitala

Asturies sigue'l mesmu camín que Catalunya, Euskadi y Andalucía, países onde los sos parllamentos aprobaron mociones d'apoyu a la investigación abierta nel 2010 pola xueza arxentina María Servini de Cubría tres una denuncia de familiares de represaliaos pol franquismu, solicitando al Estáu español información sobre los militares involucraos na dictadura y llistes d’asesinaos y desapaecíos, ente otros documentos. Nel nuesu territoriu, La Comuna d'Asturies vien recopilando casos asturianos socedíos na etapa que garra esta causa, ente’l golpe d’Estáu de Franco nel 1936 y les primeres eleiciones democrátiques nel 1977, que desendolcaron en delles denuncies presentaes nel Consuláu d’Arxentina en Madrid y Vigo.

Esti coleutivu, miembru de la Coordinadora estatal d'Apoyu a la Querella Arxentina contra Crímenes del Franquismu (CeAQUA), saludó'l resultáu de la votación y manifestó que "siguiremos trabayando p'algamar l'oxetivu de frayar la impunidá nel Estáu español, única vía par consiguir la verdá, xusticia y reparación de les victimes".