Asturies súmase a la celebración de San Patricio

Esti xueves ye 17 de marzu, San Patricio, una festividá que se celebra en tol mundu. Tamién n'Asturies, onde ta la única capiella dedicada al santu patrón d'Éire en tol Estáu. L'edificiu asitiáu en Pancar illumínase de verde, al igual que la torre medieval de Llanes. Mentes, en Manhattan va desfilar El Penedón.

Construyida a finales del sieglu XIX pol emigrante a Estaos Xuníos Gaspar de la Vega y terminada nel 1922, añu de la independencia d'Irlanda, la capiella asitiase cerca de la cueva nomada de San Patricio. Esta nueche, como faen cientos d'edificios de tol mundu, illuminaráse de verde pa celebrar la festividá del santu, al igual que la torre medieval asitiada na capital del conceyu.

Asturies tamién ye protagonista nun de los acontecimientos principales del día, como ye la New York City Saint Patrick's Day Parade. La Banda de Gaitas El Penedón, de Castropol, va participar nel popular desfile que percuerre güei les cais de Manhattan, presencia que destaca la propia organización na so web. Nos díes siguientes celebrán más actuaciones na nomada 'Gran Mazana'.

Folixes nos chigres

Los chigres asturianos suménse, como ye vezu, a la festividá, con promociones y conciertos. Ye'l casu del Señor Lúpulo en Xixón, onde los miembros del desapaecíu grupu Sambre Raúl Llope, Hugo y Pelu, y Jairo (Lupus Dei) van interpretar n'acústicu cantares punk-folk irlandeses a partir de les 20 hores. El Trisquel mentes celebra una fiesta Guinness y el Ca Beleño, n'Uviéu, otra con pintes de la stout asturiana Ordum Kraken y l'escenariu abiertu pa los músicos.