Un 68 por cientu de los usuarios d'Asturies.com califica de propaganda'l proyeutu de Ciudá Astur

Los llectores d'Asturies.com nun ven con bonos güeyos'l proyeutu de Ciudá Astur que lidera Javier Fernández y la FSA-PSOE. Pa un 68 por cientu de les persones que participaron nel nuesu 'Conceyu Abiertu' ye namái propaganda.

Mentes, un 32 por cientu sí lu ve como un aciertu pola posibilidá qu'ufre de "axuntar servicios" nesti área formada por 29 conceyos y qu'ocupa'l 29 por cientu de la superficie d'Asturies. Nella vive'l 80 por cientu de la población asturiana.

El presidente Fernández propón nun borrador presentáu'l pasáu día 16, siete afalamientos pa ordenar l'área central y convertila nuna gran ciudá de sevicios integraos, ente los que destaca llendar la creación d'urbanizaciones, potenciar l'usu del tresporte ferroviariu o negar la creación de más superficies comerciales. La intención socialista ye convertir al 'Área Metropolitana Asturias' nun motor pal país, axuntando a los 29 conceyos nun consorciu xunto col propiu Gobiernu.

Sicasí, el proyeutu nun cuenta con munchos apoyos. Podemos, Foro y PP yá amosaron la so oposición al mesmu.

Polémica n'Uviéu pola Selmana Santa

Dende esti momentu yá ye posible participar nun 'Conceyu Abiertu' nuevu. Nesta ocasión queremos conocer la so opinión sobre la polémica qu'hebo esta Selmana Santa n'Uviéu pola posición que caltuvo'l 'tripartitu' con respeuto a les celebraciones relixoses, cola retirada de subvenciones –otros años ascendió a los 21.000 euros– y la prohibición de participar con uniforme a bomberos y policía llocal na escolta de los pasos nes procesiones, lo que provocó les crítiques del arzobispu Jesús Sanz na homilía d'ayeri na catedral.