IX y Podemos busquen l'apoyu de la Xunta Xeneral pa la Querella Arxentina

Dambes formaciones presenten una proposición non de llei pa que la Xunta Xeneral sofite la Querella Arxentina contra'l franquismu por xenocidiu siguiendo'l mesmu camín que los parllamentos de Catalunya, Euskadi y Andalucía. Esti vienres va aldericase en Plenu.

La Comuna d'Asturies, plataforma asturiana que participa na Coordinadora estatal d'Apoyu a la Querella Arxentina contra Crímenes del Franquismu (CeAQUA), vien trabayando pa consiguir el sofitu de la Xunta Xeneral a esta querella dende hai tiempu. Los contautos colos grupos parllamentarios tuvieron llugar a últimos del 2015, recoyendo'l guante Podemos y Izquierda Xunida, que lleven l'asuntu a la sesión plenaria del vienres.

D'esta forma, d'aprobase col previsible apoyu de la FSA-PSOE, el nuesu Parllamentu siguiría'l mesmu camín que 19 conceyos asturianos y otres cámares nacionales, como la catalana, la vasca y l'andaluza. Nel 2010 la xueza María Servini de Cubría abrió una investigación tres una denuncia de familiares de víctimes y solicitó al Estáu español información sobre los militares involucraos na dictadura y llistes d’asesinaos y desapaecíos, ente otros documentos. Dellos coleutivos recibieron con esperanza esta iniciativa de la xusticia arxentina al entender que, tres la Llei d’Amnistía del 1977, los crímenes franquistes quedaron impunes dafechu, creándose plataformes d’apoyu a la querella.

Nel nuesu país, La Comuna d'Asturies vien recopilando casos asturianos socedíos na etapa que garra esta causa, ente’l golpe d’Estáu de Franco nel 1936 y les primeres eleiciones democrátiques nel 1977, que desendolcaron en delles denuncies presentaes nel Consuláu d’Arxentina en Madrid y Vigo.

Xusticia, non venganza

Concha Masa, por parte d'Izquierda Xunida, y Rosa Espiño, por Podemos, presentaron esta mañana de manera conxunta esta iniciativa. “Queremos que  les  víctimes, represaliaos y les sos families tengan un mínimu de xusticia, que non de venganza”, afirmó la diputada de la coalición, mentes qu'Espiño apunto que "nun podemos quedanos atrás", añadió en referencia al restu de cámares territoriales que sofiten la Querella Arxentina.

La proposición non de llei busca'l compromisu de la Xunta Xeneral pa "adoptar les midíes necesaries pa garantizar a los represaliaos y represaliaeas pola sedición militar de xunetu del 1936 y el terrorismu d'Estáu instauráu pol réxime franquista, l'exerciciu del so derechu a la verdá sobre la naturaleza d'aquel réxime pa contrarrestar los intentos de reescribir la historia que se vienen faciendo; el derechu a la xusticia efeutiva, mediante la que se pueda superar l'estáu actual d'impunidá de los responsables de los crímenes contra la humanidá cometíos, y el derechu a una reparación digna y non discriminatoria poles vulneraciones causaes a los centenares de miles de víctimes del franquismu; y, por último, el derechu del conxuntu de la sociedá a que s'entamen midíes de cambios sociopolíticos, xurídicos y institucionales como garantía de non repetición", espliquen dende IX.

Na semeya, Masa y Espiño.