Siero tamién tendrá ordenanza d'usu del asturianu

La propuesta de Somos Siero salió alantre nel Plenu del xueves col sofitu de PSOE, Foro, IX y la Plataforma Vecinal de La Fresneda, y l'astención de PP y PINSI. El voceru de la candidatura de xunidá popular, Javier Pintado, espera que tea llista pa depués del branu.

"Tamos mui contentos, sobre manera pol apoyu grande que nos mostraron Foro, PSOE y IX", afirma Pintado, que llamenta "intervenciones d'otros tiempos" mientres l'alderique de la propuesta pa la redaición de la ordenanza que regularizará l'emplegu del idioma. En concreto referíase a la vocera del Partido Popular (PP), Beatriz Polledo, que reinvindicó que la llingua materna de los sierenses "ye l'español", pa depués afirmar que los partidarios del asturianu son "un grupu minoritariu que lu defende porque hai subvención".

Los populares, que siguen una llinia d'ataque continuu al idioma nos meses últimos dende'l refugu de la so presidenta Mercedes Fernández al usu de la llingua asturiana na Xunta Xeneral, qu'esta selmana tuvo repercusión por mor de l'anulación por parte de la Delegación del Gobiernu estatal n'Asturies del Plan de Normalización Llingüística de Carreño, sicasí s'astuvieron na votación, al igual que'l Partido Independiente de Siero (PINSI). L'edil Juan Camino Fernández sí que se declaró favoratible al asturianu, pero non a una supuesta imposición nin a aumentar el gastu corriente.

"Tenemos que facer un trabayu de didáutica; esplicar que l'asturianu ye de nueso, que forma parte de nós y que nun hai qu'avergoñase d'ello", apunta Pintado, qu'espera que'l testu tenga "si non unanimidá, si un apoyu mayoritoriu". De momento, Somos Siero aceptó la enmienda presentada pol PSOE, que demandaba "pa sorpresa de nós", que la redaición corriera a cargu de téunicos municipales, dalgo que la candidatura de xunidá popular daba por fecho.

En setiembre

Tres l'aprobación en Plenu de la redación de la ordenanza, l'equipu del Gobiernu del PSOE habrá d'encargar a los téunicos la ellaboración del borrador pal so alderique y modificación na Comisión de Cultura. Darréu dirá a Plenu pa la so aprobación y pasu posterior a información pública, enantes del so afitamientu definitivu.

Pintado cuenta con que'l Conceyu de Siero pueda contar "cola ordenanza pa setiembre si too va bien". Na so páxina web, Somos Siero tien espublizao una propuesta de testu pa la mesma compuestu por 17 capítulos dividíos en seis capítulos.