Asturies canta a Silvio Rodríguez nun conciertu homenaxe n'Uviéu

|
Asturies canta a Silvio Rodríguez nun conciertu homenaxe n'Uviéu

Los Berrones, Marisa Valle Roso y Jerónimo Granda son dalgunos de los artistes participantes nel tributu al músicu cubanu, que va actuar en Xixón n'abril.

L'asociación cultural La Ciudadana entama esta iniciativa na que participen destacaos intérpretes de la música asturiana, que fadrán les sos versiones propies de cantares de Silvio Rodríguez. Asina, amás de los yá citaos, van participar na cita Alberto & García, Vaudí, Héctor Tuya, Perro Blanco Blues, Aníbal Menchaca ya Isa Muñiz, Cruz Martínez (A Contratiempo) y Delagua col Coru Internacional Antifascista 'Al altu la lleva'.

El conciertu va celebrase'l sábadu, a partir de les 20 hores, con entraes a 8 euros, que pueden mercase de manera anticipada nel Teatru Campoamor o al traviés de Tiquexpress. La organización solicita tamién la entrega d'un llitru de lleche a la puerta del Filarmónica cola fin d'utilizalu nel proyeutu solidariu de los almuerzos pa neños y neñes del Ca Beleño.

Visita a Xixón

La casualidá quixo que 'Te doy una canción: Asturies canta a Silvio Rodríguez' tuviera llugar poco enantes de la visita del músicu cubanu al nuestru país dientro de la so xira actual. Rodríguez va tar en Xixón el 10 d'abril pa ufrir un conciertu nel Palaciu de Deportes. Va ser a les 20 hores y nel va presentar 'Amoríos', el so trabayu últimu. Les entraes tienen un preciu de 39,30, 45,50 y 55,70 euros.

 

Contador Estadistiques