Ambás ganador del premiu Fini Suárez de folclore

Na mañana d'esti llunes día 30 conocióse'l ganador del Premiu Fini Suárez d'investigación folclórica. El ganador na novena edición foi Xosé Antón Fernández "Ambás", investigador y comunicador del folclore asturianu, que nos últimos años rescampla como una de les principales figures de la divulgación de la cultura tradicional asturiana, especialmente la musical.
 
El premiu, creáu na alcordanza de la fallecida folclorista mierense Fini Suárez, reconoz el trabayu de persones o entidaes a favor del caltenimientu y divulgación de la cultura asturiana, y nesti sen, Ambás rescampla con nota. Asina lo aseguró'l conceyal de festexos del Conceyu de Mieres Rafael Perdiguer, que xunta la comisión del premiu, dieron anuncia del ganador nun actu que sirve d'antoxana pa la Folixa na Primvera, que se celebra'l próximu fin de selmana en Mieres. Poro, la entrega del premiu va facese'l esti mesmu vienres día 3 dientro de los actos del festival folk.
 
Xosé Antón Fernández "Ambás", convirtióse nos últimos años nuna de les figures más conocíes no que ye la divulgación de la cultura tradicional asturiana, gracies sobre too a ser el presentador del programa de televisión de la TPA "Camín de Cantares". Pero anque esti programa-y dio lo más de la fama n'Asturies, nun ye solo esti programa de lo que puede presumir nel so currículum. Y ye qu'Ambás lleva muncho trabayando pola música asturiana, tanto na so faceta más tradicional como nuna vertiente más folk. Entamó tocando la gaita montando'l so primer grupu folk, "N'arba", banda mui querida que dio dos discos y que nestos momentos ta inactiva. A lo cabero de la vida de N'arba, Ambás crea -ya como cantante- xunta a otros dos persones"Tuenda", el tríu folk frutu d'un conciertu con motivu del ciclu de conciertos "Folk de Cámara". Pero amás d'esta faceta de músicu, Xosé Antón rescampla pol so llabor investigador, percorriendo Asturies grabando la tradición musical asturiana, creando asina un archivu personal de los más importantes d'Asturies, y que ye referente y ferramienta de trabayu pa muncho musicólogos y grupos de folk.