Darréu súmase a la plataforma ¡Asturies en Pie!

La organización Darréu vien d'incorporase a ¡Asturies en Pie!. Esta plataforma de coleutivos sindicales y sociales concentróse esti llunes n'Uviéu n'apoyu de los mineros de Zarréu imputaos.

Según espresen nun comunicáu, l'oxetivu de participar en ¡Asturies en Pie! ye'l de sumar na "resistencia a les polítiques del réxime n’Asturies", pero tamién poner "el nuesu granu de sable nel intre de construyir el poder popular que pueda faer frente al sistema capitalista que nos esplota". Anguaño, la plataforma ta formada pola Corriente Sindical d'Izquierda (CSI), la Confederación General del Trabajo (CGT), CNT-Xixón, Sindicatu Unitariu de Trabayadores de la Enseñanza d'Asturies (SUATEA), Fondu xUnitariu de Solidaridá Obrera d'Asturies (FUSOA), Centru Social Autoxestionáu La Semiente, Para@os y Precari@s d'Asturies, Centru Social Sestaferia, Asociación Picu Rabicu, Centru Social La Llume y Llar La Llegra.

Otra manera, ¡Asturies en Pie! concentróse esta mañana frente a los Xulgaos de lo Penal d'Uviéu en defensa de los cinco emplegaos de la mina de Zarréu imputaos por socorrer a trés compañeros accidentaos énte una actuación del capataz que consideraben errónea y que ponía en peligru la so vida. Estos trabayadores tán acusaos de delitos de lesiones, amenaces y daños, con un pidimientu de condena de 6 años y mediu de prisión pa caún y multes superiores a los 15.000 euros. El sábadu, en Cangas del Narcea, centenares de persones pidieron l'absolución de los mineros nuna manifestación peles cais de la villa.