SUATEA gana les eleiciones sindicales na enseñanza y CSI algama representación

El xueves celebráronse les eleiciones sindicales na enseñanza con trunfu, per tercer ocasión consecutiva, pa SUATEA. CSI, pela so parte, entra per primer vegada na Xunta de Personal Docente.

El Sindicatu Unitariu Autónomo de Trabayadores del Enseñu n'Asturies (SUATEA) sumó 1.122 votos (un 23,27 por cientu del total), lo que-y permite algamar 10 de los 41 representantes na xunta de personal, ún menos que nes eleiciones anteriores. Mesmu númberu algama FETE-UXT, con dos votos menos (un 23,23 por cientu), calteniendo la mesma representación. Con 9 queda ANPE (1.010 votos; 20,9 por cientu); con 7, CC OO (839; 17,4 por cientu); y con 3, CSIF (351, 7,28 por cientu). La gran sorpresa de la xornada foi la de CSI Educación, que con 277 votos (5,7 por cientu) suma 2 delegaos, algamando asina representación per primer vegada.

Nun comunicáu, SUATEA agradez "la confianza que los y les docentes depositaron nel nuesu sindicatu" y comprométese "a continuar cola nuesa llinia sindical de llucha en defensa de la educación pública". Ente les sos "prioridaes" ta "la defensa de la especialidá d'asturianu".