SYRIZA forma gobiernu en Grecia tres pautar cola derecha nacionalista

Alexis Tsipras yá exerce de primer ministru de Grecia tres algamar l'apoyu de la formación derechista Anexártiti Éllines. El Gobiernu de SYRIZA va contar con diez ministerios.

Esta decisión supón rebaxar el númberu de carteres n'ocho, yá que l'Executivu anterior de Néa Dimokratía contaba con dieciocho. La coalición d'izquierdes ganó les eleiciones griegues del domingu al sumar el 36,34 por cientu de los votos y sumar 149 escaños, quedando a dos de la mayoría absoluta. La segunda formación con más apoyos foron los conservadores de Néa Dimokratía, con un 27,81 por cientu (76 escaños), siguíos de la formación neonazi Chrysí Avgí, con un 6,28 por cientu de los votos (17). Tamién algamaron representación la formación centrista To Potami, con 16 parllamentarios (6,04 por cientu); los comunistes del KKE, con 15 (5,47 por cientu); la derecha nacionalista Anexártiti Éllines, con 13 (4,75 por cientu); y los socialdemócrates del PASOK, tamién con 13 (4,68 por cientu).

Estos resultaos llevaron a Tsipras a pautar con Anexártiti Éllines (Griegos Independientes), pese a la diferencia ideolóxica, por caltener una llinia similar contra les polítiques d'austeridá y la oposición a la Troika. El líder de los derechistes, Panos Kamenos, va llevar la cartera de Defensa.