Según el Conceyu por Otra Función Pública n'Asturies, l'alministración asturiana tien creaos nos últimos 3 años mas de 100 nuevos puestos cola "denominación de Coordinador o Asesor, de nivel 26 o superior, asitiaos, nos más de los casos, ente les Xefatures de Serviciu y de Seición, toos ellos nomáos a déu". Asimesmo conseñen que'l "coste económicu que supón caltener esta nueva estructura de 100 puestos d´élite nel añu 2009 ronda los cinco millones d´euros ( 850 millones de les antigues pesetes)".

La Tertulia Pachín de Melás, que dende hai unos meses vien desarrollando en Xixón alderiques abiertos sobre bayura de temes sociales y culturales, anuncia pal próximu xueves 16 d’abril una nueva tertulia baxo’l títulu: “Nacionalismu asturianu na transición”. Na charra participarán Xosé Lluis Carmona, fundador del Conceyu Nacionalista Astur; Ignaciu Llope, escritor y militante d’Unidá Nacionalista Asturiana; y Patrick Zimmerman, historiador y investigador del nacionalismu asturianu. Pela so parte la presentación correrá a cargu de Xelu Neira.

Pa los meses de mayu y xunu entama en Llangréu un cursu d'acompañamientu de gaita n'asturianá que va tar repartíu en 10 clases teóriques y práctiques con cantadores d'asturianá. Impartiráse tolos sábados ente les 16 y les 19h. nel Conservatoriu Profesional de Música "Valle del Nalón", más tres clases extra pa la práutica con cantadores. Valentín Fuente va ser el profesor esti cursu.

La Coordinadora Ecoloxista d'Asturies ta acabante de presentar una denuncia énte l'alministración asturiana, la Demarcación de Carretres, la Confederación Hidrográfica y el Seprona, pola aparición de basa nel puertu de Cuideiru, producida "aparentemente pola repla de les obres de l'autovía".

L’equipu asturianu perdió contra’l Valencia nel Molinón y ponse a namás un puestu del descensu. Nun partíu nel que merecieron meyor suerte, los asturianos perdieron a tres minutos del final, nun pudiendo o nun queriendo amarrar a lo menos un puntu. A too ello añadiose una actuación arbitral que volvió amosar una tendencia non casual nesti colectivu: énte la duda, siempre a favor del grande.

La escritora Nené Losada Rico falleció esti sábadu nel hospìtal de Xarrio. Nené Losada nació en L.luarca'l 10 de payares de 1921. Yera Fia Predilecta del conceyu valdesán y Medalla de Plata d'Asturies. Ente les sos obres rescamplen "Cantares valdesanos" (1992), "Entre apigarzos" (1997) y "El nome de las cousas" (2001). Nos últimos años asoleyó "Fueyas que reverdecen", una antoloxía de la so obra na llingua del país y "Obra poética en castellano". Dende 2001 un premiu de poesía lleva'l so nome.

La multinacional ArcelorMittal anunció ayeri a los sindicatos la so decisión de parar la producción d'ún de los altos fornos de les instalaciones de Veriña, en Xixón. Asina lo comunicó nel conceyu del Comité restrinxíu que se celebró güei en Luxemburgo.

La campaña “Doi la Cara pola Oficialidá”, entamada pol Conceyu Abiertu pola Oficialidá, yá tien el sofitu de más de 9.000 persones nuna iniciativa na que tan dando “lliteralmente” la cara a favor del reconocimientu oficial pa la llingua asturiana.

El 30 d’abril va entamar na Casa de Cultura “Teodoro Cuesta” de Mieres un cursu d’historia y llinguaxe cinematográficu dirixíu pol director asturianu Jorge Rivero. El cursu consta d’un total de 40 hores, repartíes en 20 clases de dos horas selmanales. Esta actividá va desarrollase al empar nel Atenéu de Turón.

La Xunta pola Defensa de Llingua Asturiana ta acabante de dar anuncia de qué grupos van actuar nel XXI Conciertu pola Oficialidá. Rock y folk son otra vuelta los sones que van llenar carpa onde la reivindicación llingüísitica entama una fiesta pol futuru de la llingua asturiana.