Avilés y Xixón acueyen dos charles sobre la crisis económica

Esti llunes 20 y martes 21 van celebrase n'Avilés y Xixón dos charles alrodiu’l tema la crisis económica. Éstes, organizaes pol "Comité de Apoyo de Izquierda Anticapitalista en Asturies", van centrase nun "plantegamientu de qué rempuestes polítiques y sindicales vamos poder dar a la crisis sistémica actual dende una perspectiva anticapitalista".

Les charles van contar cola participación de dellos sindicalistes de distintos sectores y esperiencies "que mos van apurrir los sos puntos de vista sobre la crisis y qué creen ellos que ye la rempuesta qu’hai que dar". En primer llugar va participar Cándido González Carnero, que foi sindicalista de la Naval Xixón y que va dar "una visión en perspectiva de lo que fueron les lluches del nuesu pasau reciente". Tamién va participar Juan García Alonso, presidente del comité d’empresa de TUA, la empresa de tresporte urbanu d’Uviéu, que "vienen de ganar un conflictu llaboral hestóricu na empresa". Finalmente participará Álex García Ferrer, militante d’Izquierda Anticapitalista y sindicalista de McDonalds en Granada que va contar "la so particular esperiencia no que puede denominase 'nueu sindicalismu'.

Les charles van facese’l llunes 20 d’abril a les 19:00 hores nel Palacio de Valdecarzana d’Avilés (C/El Sol s/n) y el martes 21 d’abril a les 19:30 hores nel Ateneo Obrero de Xixón (C/Covadonga 7, 1º Izq.).