Entama la XII edición de "Motiva", xornaes dedicaes al diseñu gráficu y industrial

Asturies conviértese un añu más por estes feches en puntu de referencia del diseñu gráficu y industrial. Del 20 al 24 d'Abril Motiva avera al traviés de delles conferencies en Llaboral Centru d'Arte de Xixón, tolos factores qu'igüen el desendolcu d'un proyectu, dende la gráfica hasta'l Marketing BTL (Below the line).

"Motiva" ñaz en 1997 gracies al enfotu del Departamentu de Gráfica Publicitaria de la Escuela d'Arte d'Uviéu, y surde ente la necesidá d'algamar un ambiente cultural afayadizu pa implicar a tolos sectores rellacionaos cola actividá del diseñu gráficu n'Asturies, esto ye, empreses, instituciones y profesionales.

Anguaño la organización de les xornaes ye responsabilidá del IDEPA, l'Asociación de Diseñadores Gráficos d'Asturies, la Escuela Superior d'Arte del Principáu d'Asturies y l'Asociación de Diseñu Industrial d'Asturies.

Amás de les conferencies, que van celebrase hasta esti vienres 24 y nes que van participar destacaos profesionales, les actividaes de "Motiva" complétense con talleres y esposiciones que pueden visitase en Xixón, Uviéu y Avilés.
 
Asturies.com ufre a los sos lectores, adxuntu a esta noticia, el porgramu completu de "Motiva" en formatu pdf.