El Gobiernu aprobó que los caxetos de tabacu lleven una imaxe sobre los efeutos del tabacu, con semeyes de cadabres, tumores de pulmón y pescuezu y dentadures estropiaes.

El Real Decretu aprobáu pol Conseyu de Ministros, establez qu'a partir d'esti mes y con una prórroga "de 12 a 24 meses", van tener qu'usase una de les 14 imaxes escoyíes por Sanidá del catálogu aprobáu pola Comisión Europea en mayu del 2006.

El Secretariu Xeneral de Política Llingüística gallegu, Anxo Lorenzo, propúnxo-y al Arzobispu de Santiago que’l Papa faiga usu del gallegu mientres la so visita a Galicia.

Profesores y alumnos d’un institutu de Tarazona (Zaragoza), pidieron que’l so centru ufierte l’asignatura d’aragones, a pesar de tar fuera de la zona aragonesofalante.

La idea surdió de dellos alumnos y profesores tres una charra sobro la llingua aragonesa. Asina, presentaron una solicitú a la conseyera d'Educación pa que se incluya l'asignatura optativa d’aragonés nel sistema educativu aragonés y especialmente nel so institutu.

La XDLA califica d'ésitu la campaña de mailing, con más de 3.000 correos unviaos a los direutivos del Ente Públicu, y anuncien que van denunciar a la RTPA énte la Procuradora.

La Xunta pola Defensa de la Llingua Asturiana entamó va unes selmanes una campaña per Internet pa pidir a los miembros de la dirección de la RTPA más programación n’asturianu, con meyores horarios y más amplitú temática, amás del respetu a la toponimia oficial na programación en castellanu.

El presidente del PP d'Asturies pidió-y a Mariano Rajoy qu'Álvarez-Cascos seya'l próximu candidatu popular. Sicasí, Cospedal afirmó desconocer tal pidimientu.

El Conseyu Xeneral del Poder Xudicial alcordó por unanimidá suspender al xuez de l'Audiencia Nacional Baltasar Garzón depués d'abrise xuiciu oral contra él nel Supremu

Xega celebra’l 17 de mayu centrándose na realidá transexual. Mieres va ser la sede de les actividaes reivindicatives nes que quieren prestar especial atención al ámbitu rural.

El 17 de mayu de 1990 la Organización Mundial de la Salú (OMS) desanició la homosexualidá del so catálogu de trestornos mentales. Venti años depués, Xega recuerda que la fecha “sigue siendo necesaria pa recordar que les distintes orientaciones sexuales ya identidaes de xéneru son motivu d'una discriminación que tien de ser erradicada de la sociedá”.

Nel Día Mundial del Reciclaxe, la Coordinadora Ecoloxista fai un llamáu pa dexar de llau la incineradora y apostar por polítiques de reciclaxe, “de les que cada vez tamos más lloñe”.

Los ecoloxistes camienten que n’Asturies nun hai nada que celebrar esti domingu 16 de mayu, Día Mundial del Reciclaxe, yá que “tenemos una media del 9,7% de reciclaxe, frente a otros llugares onde yá consiguen el 30%,  hai conceyos n'España con tases reales del 82%, países d'Europa con tases del 70%, mentanto equí nun llegamos al 10%”.

L'Índiz de Precios de Consumu (IPC) aumentó un 1,2 por cientu n'abril n'Asturies en comparanza con marzu, un puntu más que nel conxuntu del Estáu (+1,1%).

Amnistía Internacional denuncia que China viola los derechos humanos énte la pasividá de la UE. Dellos activistes van realizar n'Uviéu un repartu de periódicos chinos censuraos.

Asina, quieren llamar l'atención sobre la necesidá de que los derechos humanos tean presentes nes próximes conversaciones ente la Unión Europea y China que se van celebrar en xunu. AI reclama qu'estos alcuentros seyan tresparentes, asina como que s'informe sobre'l so conteníu y resultaos a les organizaciones y sociedá civil china y europea.