Xega reivindica la dignidá LGTB nel Día contra la homofobia

Xega celebra’l 17 de mayu centrándose na realidá transexual. Mieres va ser la sede de les actividaes reivindicatives nes que quieren prestar especial atención al ámbitu rural.

El 17 de mayu de 1990 la Organización Mundial de la Salú (OMS) desanició la homosexualidá del so catálogu de trestornos mentales. Venti años depués, Xega recuerda que la fecha “sigue siendo necesaria pa recordar que les distintes orientaciones sexuales ya identidaes de xéneru son motivu d'una discriminación que tien de ser erradicada de la sociedá”.

N'Asturies, el coleutivu de lesbianes, gais, transexuales y bisexuales (LGTB) algamó en pasaos 17  de mayu, una declaración institucional de la Xunta Xeneral (2005), l'adhesión del Gobiernu del Principáu (de 2005 a 2007) y de conceyos como'l de Grau (2005).

Xega centra les sos reivindicaciones, per un llau, nes realidaes de lesbianes, muyeres bisexuales y transexuales y, más concretamente, nes persones transexuales, “nel estigma que carguen y les sos consecuencies, que lleven al desempléu, la precariedá, y el despreciu per parte de la opinión pública”.

Coles mesmes, pídese a les autoridaes sanitaries que s'incluya'l procesu transexualizador na cartera de servicios de la Seguridá Social, que se dexe de considerar la transexualidá como una enfermedá, y que les instituciones educatives apuesten por una educación plena y inclusiva.

Amás, recuerden la sistemática vulneración de los derechos humanos de les persones transexuales en munchos países, “onde son maltrataes, encarcelaes, violaes o asesinaes ensin protección de los sos gobiernos por motivu de la so identidá de xéneru”. Nesti sentíu, Xega xuntóse a la campaña internacional sobro relixones, homofobia y transfobia qu’entamó la plataforma International Day against Homophobia and Transphobia (IDAHOT). Amás, van desendolcar delles actividaes a lo llargo de la siguiente selmana.

Asina, el vienres 14 y sábadu 15 de mayu, TríbadAS, l’área de lesbianes, entama un taller d'alderique alrodiu de l'ausencia de les muyeres lesbianes y transexuales nes polítiques d'igualdá. Esti taller, col oxetivu de la formación, ta empobináu a les activistes de los movimientos sociales de la muyer y a responsables de Planes d'Igualdá y va ser conducíu por Raquel Platero, activista LGTB, psicóloga ya investigadora. Vaa desenvolvese nes dependencies del Conseyu de la Mocedá de Xixón.

El llunes 17 de mayu, Día Mundial contra la homofobia, a les 11:30 hores va haber una recepción institucional nel Conceyu de Mieres, cola llectura del manifiestu del 17 de mayu y l’izáu de la bandera LGTB nel balcón del Conceyu. Mientres que’l martes 18, habrá una intervención d'activistes lésbiques nun programa especial de Radio Parpayuela nel que se va falar de les realidaes del lesbianismu. Va emitise de 19:00 a 21:00 al traviés del 94.0 de la FM y en www.parpayuela.com.

Les actividaes van finar el xueves 20 de mayu a les 20 hores.con una mesa redonda na Casa de Cultura de Mieres, na que van intervenir, ente otros, Carla Antonelli, activista transexual y actriz, y Mané Fernández Noriega, coordinador de XEGA. Nella falarán del presente y futuru de la realidá de la transexualidá.