Amnistia denuncia la situación de China n’Uviéu

Amnistía Internacional denuncia que China viola los derechos humanos énte la pasividá de la UE. Dellos activistes van realizar n'Uviéu un repartu de periódicos chinos censuraos.

Asina, quieren llamar l'atención sobre la necesidá de que los derechos humanos tean presentes nes próximes conversaciones ente la Unión Europea y China que se van celebrar en xunu. AI reclama qu'estos alcuentros seyan tresparentes, asina como que s'informe sobre'l so conteníu y resultaos a les organizaciones y sociedá civil china y europea.

La organización recuerda que los activistes de derechos humanos en China arriésguense a sufrir grandes abusos, tamién apunten como en China hai unos 68 delitos condenaos a muerte y execútase al añu a más persones qu'en cualesquier otru país del mundu.
          
Señalen tamién la situación del pueblu uigur de China occidental: “la so identidá étnica ye sistemáticamente menospreciada, les polítiques gubernamentales, incluyíes les que llinden l'usu de la llingua uigur, les fuertes restricciones sobro la llibertá relixosa y el fluxu constante de migrantes chinos d'etnia han haza la rexón tán destruyendo les sos costumes y, al par de la discriminación llaboral, tán avivando'l descontentu y les tensiones étniques”.

AI-Asturies va recoyer mientres l'actu robles pa solicitar la lliberación de Yang Chunlin, quien en marzu de 2008 foi declaráu culpable de “afalar a la subversión contra'l poder del Estáu” y condergáu a cinco años de cárcel, siguíos de dos años de privación de derechos políticos.

Según la información de la que dispón la organización, los cargos contra él debense a la campaña que, col lema “Queremos derechos humanos, non Xuegos Olímpicos”, empecipió pa consiguir  una indemnización pa los llabradores a los qu’habíen confiscáu les sos tierres y pola so participación na recoyida de más de 10.000 firmes na provincia de Heilongjiang.

L'acción va tener llugar esti sábadu 15 de mayu na Plaza de La Escandalera d'Uviéu a les 12.00 de la mañana pa denunciar la persistencia de graves violaciones de derechos humanos en China.