Francia xustifica en Bruseles la espulsión de xitanos

El ministru d'Inmigración francés, Eric Besson, y el secretariu d'Estáu p'Asuntos Europeos galu, Pierre Lellouche, viaxen esti martes a Bruseles pa dar esplicaciones al Executivu comunitariu pola espulsión de persones d'etnia xitana .

Van recibilos a partir de les 14:30 hores pola vicepresidenta de la Comisión Europea y comisaria de Xusticia, Viviane Reding, y pola comisaria d'Interior, Cecilia Malmström. Tamién van xuntase con un representante de la dirección d'Empléu y Asuntos Sociales, porque'l comisariu d'esta cartera, Laszlo Andor, nun ta na capital europea.

Esta xunta va ser un día enantes de que la vicepresidenta Reding presente a los sos collacios del Colexu de Comisarios l'informe "llegal y políticu" sobre les midíes adoptaes por París, nel marcu d'una xunta de dos díes y a puerta zarrada cola que l'Executivu comunitariu torna al trabayu tres del parón del branu.

Bruseles podría aniciar un procedimientu escontra Francia si fina con qu'escaeció les normes europees nesti casu, recordaron fontes comunitaries.

La xunta d'esti martes ye'l resultáu d'una conversación telefónica ente'l primer ministru François Fillon y el presidente de la Comisión, José Manuel Durao Barroso, na que dambos alcordaron la necesidá d'una discusión "directa" sobre un dossier "tan sensible", según informó un portavoz comunitariu.

Fillon aneció entós en que "toles midíes tomaes nos caberos díes y les próximes que se tomen tán, na so opinión, del too conformes a la llei", según el mesmu portavoz, quien indicó que Barroso "tomó nota" d'eses garantíes.

Tres delles selmanes recordando a París que tien la "obligación" de cumplir les normes europees en materia de llibertá de movimientu y otres rellacionaes colos derechos fundamentales, la Comisión valoró la "evolución positiva" del Gobiernu galu al aceptar axuntase con Bruseles.

El Ministeriu d'Inmigración francés anunció una xunta pal viniente 6 de setiembre ente los 'grandes' Estaos miembros, metíos Italia y España, pa falar de la inmigración irregular, pero nun convidó a la Comisión, que tradicionalmente sí participa nesta clas d'alcuentros.

Pa finar, cambió d'opinión y convocó a la comisaria Malmström, que nun confirmó entá la so asistencia. El Ministeriu galu tamién emitió un comunicáu pa refugar que la espulsión de xitanos vaya a metese formalmente nel orde del día del alcuentru, que foi rebaxáu a la categoría de "seminariu de trabayu".