L'escritor candasín Xurde Fernández presenta esti xueves, 23 d'avientu, 'Intentu d'escritura', una novela negra qu'ofrez una güeyada orixinal sobre l'exerciciu de la lliteratura.

El pub Creisi de Candás acoyerá a partir de les 19.00 hores l'actu de presentación de la obra, que contará cola intervención de los tamién escritores Silvia Cosio y Xandru Fernández, repesentantes de Suburbia, editorial cola que sal esta novela. L'establecimientu candasín, del que Fernández ye veceru avezáu, valió-y d'inspiración pa crear delles situaciones na novela.

El Tribunal Supremu ordenó a la Generalitat de Cataluña llevar adaptar el so sistema d'enseñanza a la "nueva situación creada" pol fallu sobre l'Estatutu, que considera'l castellán como "llingua vehicular" nos centros docentes de la comunidá.

Les organizaciones soberanistes Darréu y Fai! vienen d’amosar el so descontentu pola nueva ausencia d’un partíu de la selección asturiana de fútbol. Esta nueva crítica súmase a la de Xuventú Asturianista y Bloque por Asturies.

“Un partíu amistosu con otra selección nacional sedría un éxitu bultable”, señalen dende les organizaciones a la par que critiquen que la selección asturiana de fútbol lleve ocho años ensin xugar.

El diputáu del BA, Roberto Colunga, argumentó güei nel Plenu la so enmienda a la totalidá del proyectu de Presupuestu pal 2011. Según opinó, “el proyectu nun responde a les necesidaes del país con garantíes de futuru”.

Unidá Nacionalista Asturiana culpó a la "errónea" política de subvenciones a la compra de vivienda en stock de promotores de que'l preciu de la vivienda n'Asturies nun baxe lo suficiente.

La intérprete de tonada Anabel Santiago va presentar “Agora”, el so últimu trabayu, esti miércoles en Xixón. La cita va ser a les 20 hores nel Antiguu Institutu Xovellanos.

Vieyos y nuevos soníos del país amestaos a la voz d’Anabel Santiago ye lo que presenta “Agora”, la quinta referencia discográfica de la artista referencial dientro de la tonada asturiana contemporánea.

La Corriente Sindical d'Izquierdes (CSI) presentó un recursu de reforma contra l'autu xudicial que refuga almitir a trámite la querella criminal que presentaron pol supuestu zarru "fraudulentu" de Naval Xixón.

En casu de que'l recursu acabe tornáu, el sindicatu presentó subsidiariamente un recursu d'apelación.

Nel escritu de recursu, la CSI considera que se vulneró'l so derechu a una tutela xudicial efectiva y a un procesu públicu sin dilaciones y con toles garantíes, al refugase de forma precipitada y "bien parcial" los posibles delitos que se plantegen na querella.

La llibería de Trabe, asitiada na cai Buenaventura Paredes, zarrará a primeros del añu qu'entra, dempués de diez años d'actividá, obligada pola crisis económica. Siguirá, sicasí, coles sos actividades editoriales

 La entidá anuncia yá oficialmente la so decisión al traviés del so blog n'internet, y agradez el tratu de los clientes, amás de los amigos colos que contó la tienda.

En declaraciones a Europa Press, la so responsable Esther Prieto esplicó qu'esti últimu añu foi "brutal" en cuestión de ventes, motivo pol que s'acabó tomando la decisión.

Los trabayadores d’El Comercio organicen pa esti miércoles 22 un actu festivu-reivindicativu contra’l treslláu de la rotativa a Benavente y los 29 despidos. Va ser frenti al edificiu del diariu xixonés.

“Una folixa con música y varidaes pa que seya bien escuchada polos responsables del terrible erru de treslladar la rotativa a Benavente”, asina define’l colectivu de trabayadores l’actu qu’entamen esti miércoles, a les 18 hores, frenti a la sede del periódicu.