UNA diz que les ayudes faen que nun baxe’l preciu de la vivienda

Unidá Nacionalista Asturiana culpó a la "errónea" política de subvenciones a la compra de vivienda en stock de promotores de que'l preciu de la vivienda n'Asturies nun baxe lo suficiente.

Pa esta formación, la comunidá "sigue otru trimestre nel vagón de cola del axuste de los precios de la vivienda".
  
Al traviés d'un comunicáu, UNA señaló que "los datos del III Trimestre de 2010 del INE confirmen qu'Asturies se consolida nel vagón de cola de les CC.AA en cuanto l'axuste del preciu de la vivienda, siendo la cuarta onde menos baxa'l preciu namás por detrás de Galicia, Estremadura y Murcia".
  
Pa la formación, l'actual baxada del preciu, nun 2,7%, "nun puede esconder el mal comportamientu relativu de la evolución del preciu n'Asturies, yá que ye la cuarta CC.AA na que menos baxa". Según el voceru de Vivienda de la organización, Daniel Fernández, débese a "la errónea política del Principáu de subvencionar l'alquisición de viviendes del stock de promotores y constructores que fixo que los mesmos puedan caltener precios, en cuenta de amenorgalos como n'otres zones d'Estáu".
  
UNA pide "apostar por una política de vivienda que saque al mercáu aquella que tea llibre, pa evitar que la especulación traiga una xubida artificial de precios" y "retirar ayudes de tipu llineal, que namás lleva a que los promotores caltengan precios que nun podríen caltener ensin tales ayudes, porque a cencielles nun podríen vendeles", lo que pal voceru de vivienda "son ayudes tapaes a el promotores".
  
Pal representante de la organización, "a un ciudadanu da-y igual pagar 100 por una vivienda que 120 si cunta con 20 d'ayuda", cola diferencia que "el ciudadanu tien que pagar los impuestos por esos 20 d'ayuda y el beneficiu final repercute nel vendedor".