Gonzali Producciones fai un adelantu de “Los Viaxes de Gulliver”

Gonzali Producciones vien d’adelantar un vidiu colos primeros minutos de “Los Viaxes de Gulliver”, segundu llargumetraxe dobláu al asturianu que fai la productora. La estrena va ser el próximu xueves 23 d’avientu.

 

A les 18 hores nel Centru Municipal Integráu de L’Arena va proyectase per primer vez ‘Los Viaxes de Gulliver’, llargumetraxe d’animación dobláu al asturianu por Gonzali Producciones y Berona Entertaiment.

La proyección va cuntar con una introducción previa del productor y director del doblaxe n’asturianu, Illán Gonzali, y l’actor participante nel doblaxe, Antón Caamaño. Tres de la proyección, va actuar a les 19.30 el dúu Mestura.

‘Los Viaxes de Gulliver’
‘Los Viaxes de Guilliver’ (Gulliver Travels) foi'l primer llargumetraxe d’animación producíu polos Estudios Paramount, y tamién foi’l primer film d’esti xéneru que nun taba venceyáu a los Estudios Disney.

La película dirixóla Dave Fleischer y prodúxola’l so hermanu Max Fleischer, dos pioneros del cine animáu que nos años cuarenta fueron mui populares polos sos curtiometraxes de Superman.

Los guionistes Dan Gordon, Cal Howard, Tedd Pierce, Edmond Seward y Izzy Sparber encargáronse de treslladar a la gran pantalla una parte de la novela de Jonathan Swift, centrada na aventura de Gulliver nel país de Lilliput.