“Contadores de lluz” ye la nueva publicación de Suburbia Ediciones. Nella, entemécese la lliteratura cola obra fotográfica de Jandro Llaneza. El resultáu, trece escritores asturianos que trabayen sobre trece semeyes.

Pablo Texón, Quique Faes, Xabiero Cayarga, Vanessa Gutiérrez, Xandru Fernández, Alberto Carrio, Sofía Castañón, Xabel Vegas, Miguel Rojo, Pablo X. Suárez, Xurde Fernández, Iris Díaz Trancho y Ramón Lluís Bande; son los trece autores qu’escriben nesti llibru sobre les semeyes de Jandro Llaneza.

Los socios de gobiernu, PSOE y IU, aprobaron esti martes nel plenu de la Xunta Xeneral los presupuestos pal 2011 y la reforma de la Llei de Función Pública. Bloque y PP refugaron la decisión y tacharon la reforma de “inconstitucional”.

Sobre la reforma de la Llei de Función Pública, PSOE y IU unieron los sos votos para rechazar les 14 enmiendes presentaes pol Partíu Popular al un proyectu rechazáu polos sindicatos y que’l PP y Bloque por Asturies calificaron d’inconstitucional.

L’ex portavoz de Batasuna, Arnaldo Otegi, fixo nueves declaraciones rellacionaes col fin de la llucha armada per parte d’ETA. El dirixente abertzale planteó nuna entrevista a The Wall Street Journal qu’ETA ta llista “p’abandonar la violencia”.

“Abandonar la violencia y participar nuna estratexa pacífica pa crear un estáu vascu independiente”, foi la opinión qu’Arnaldo Otegi manifestó dende la cárcel al periódicu estaunidense The Wall Street Journal.

La Coordinadora Ecoloxista d’Asturies entregó la Buyada Purpurina, reconocimientu a les actuaciones contraries a la naturaleza y mediu ambiente. El conseyeru de Mediu Ambiente, Francisco González Buendía, ye’l ‘premiáu’.

El puertu de Xixón, Coxersa, la Incineradora, el Puertu d’Avilés… yeren dalgunes de les candidates a esti galardón. Sicasí, foi’l conseyeru de Mediu Ambiente, Ordenación del Territorio y Infraestructures, Francisco González Buendía, la persona con “abundantes méritos” negativos pa cola naturaleza asturiana.

L’Atenéu Cultural Xuan María Acebal y Xareos! Xestión Cultural, organicen un actu pa despidir l’añu. Nél, va presentase’l númberu doble de la revista Formientu y un brindis pol Añu Nuevu con sidra axampanao.

L’actu va celebrase’l próximu xueves 30 d’avientu na Llibrería Paraxuga d’Uviéu, a partir de les 19.30. Amás, va cuntar cola presencia de los autores que publiquen na revista.

El Conceyu por Otra Función Pública (COFPA) denunció que la tramitación parlamentaria pa camudar la Llei de Función Pública “escondía un últimu golpe de mano, dirixíu a controlar políticamente los concursos de méritos”.

El gobiernu de Bolivia aprobó una nueva llei d’educación qu’afita como llingua vehicular na enseñanza aquella que predomine en cada fastera.

“La llingua predominante sedrá la que s’usará nes aules”, afita esta llei denominada como “Avelino Siñani-Elizardo Pérez” que da puxu a les llingües autóctones de cada fastera, en cuenta de da-ylo namás al castellanu, llingua predominante hasta la fecha.

L’últimu Conceyu Abiertu d’ASTURIES.COM zarróse col resultáu de que namás un 4% de los votantes piensa que les subvenciones duermen la reivindicación llingüística. El 54% piensa qu’al Gobiernu nun-y importa la política llingüística.

L’anuncia de la reducción del 6’3% del presupuestu en política llingüística pal 2011 foi la causa d’esta encuesta. N’otres de les respuestes, un 20% valoró negativamente la reducción, anque piensa que la política llingüística debería garrar otros caminos.

A lo último, un 22% xustificó la reducción como “daqué entendible en tiempos de crisis”.

La Oficina Municipal de la Llingua de Xixón vien de convocar el concursu “Que suene la llingua”. L’oxetivu ye axuntar la llingua asturiana y la música pa crear un cantar que sirva d’himnu pa los futuros Alcuentros de la Mocedá cola Llingua.

Nesti concursu convocáu pol Serviciu de Normalización Llingüística xixonés, tamién se-y quier dar puxu a los músicos mozos. D’esti mou, los sos componentes de los grupos que participen tienen que tener menos de venti años y tar empadronaos en Xixón.

La Coordinadora Ecoloxista denunció ante la Dirección Rexonal de Mines y ante la Viceconseyeria de Mediu les “irregularidaes ambientales" que detectaron na esplotación d’una industria estractiva que s'atopa en Navia.