CSI recurre la non tramitación de la querella pol zarru de Naval Xixón

La Corriente Sindical d'Izquierdes (CSI) presentó un recursu de reforma contra l'autu xudicial que refuga almitir a trámite la querella criminal que presentaron pol supuestu zarru "fraudulentu" de Naval Xixón.

En casu de que'l recursu acabe tornáu, el sindicatu presentó subsidiariamente un recursu d'apelación.

Nel escritu de recursu, la CSI considera que se vulneró'l so derechu a una tutela xudicial efectiva y a un procesu públicu sin dilaciones y con toles garantíes, al refugase de forma precipitada y "bien parcial" los posibles delitos que se plantegen na querella.

Coles mesmes, señálase que ye "inexactu" que por Corriente Sindical d'Izquierdes nun s'exercieren les acciones llegales que la normativa vixente prevé, polo que cree que se trata d'un error d'interpretación del xulgáu.

Tamién se repite en "la íntegra totalidá de les imputaciones indiciariamente delictives, la fundamentación de les mesmes realizada nel escritu de querella y los documentos obrantes n'autos, asina como les ufiertes qu'en dichu escritu se realizaben".

Delles acusaciones
La querella presentóse contra la Dirección de Pymar y de Naval Xixón, asina como contra trés empreses "interpuestes" de la primera, Astilleros Asturianos, Dike Global y Hecikom 7.

Acúsaselos d'un delitu contra los derechos de los trabayadores, otru societariu, otru de falsedá documental y un últimu de malversación impropia, rellacionáu ésti cola xestión de fondos públicos, anque nun fuere per parte de funcionarios o autoridaes públiques.