La Xunta pola Llingua critica que s'elimine'l topónimu Xixón del nome oficial del festival de Cine

|

La Xunta pola Defensa de la Llingua (XDLA) refuga al traviés d'un comunicáu la eliminación del toponimu Xixón del logotipu nuevu del Festival Internacional de Cine.
 
"La imposición d'esti diseñu, obra del valencianu Javier Mariscal, carga directamente contra la denominación del certame, onde taba yá plenamente normalizada la presencia del asturianu al traviés del usu del topónimu tradicional, que ye oficial dende setiembre del 2006", señala la organización.
 
Sorprende, según la Xunta, qu'estes midíes rancies y involucionistes pa cola nuestra toponimia vengan precisamente dende l'actividá de la Conceyalía de Cultura de Xixón, con unos responsables que tienen el mandáu de visibilizala y que, hasta'l momentu d'ostentar cargos públicos, desempeñaron un papel activu y destacáu nel procesu de dignificación de la nuestra cultura.
 
Critica más que dende la Conceyalía de Cultura de Xixón "anunciaren un cambiu na dirección del festival pa da-y un calter más asturianu y más popular". La Xunta nun entiende "cómo pue ser el certame cinematográficu más asturianu y popular si, nesta edición, el logotipu del festival desanicia la forma tradicional. Por too ello, esiximos que, de manera inmediata, se restituya la denominación de siempre al Festival Internacional de Cine de Xixón y reclamamos que, por coherencia cola so trayectoria asturianista, los responsables de Cultura de Xixón se pronuncien al respective".

Contador Estadistiques