Esther Díaz, conseyera de Bienestar Social y Vivienda, detalló esti miércoles les cuentes del so departamentu pal 2013. Dispondrá de 324,8 millones pa “dar respuestes a les miles de families asturianes que tán xugandose'l so proyeutu vital”.

Ana González, conseyera d’Educación, Cultura y Deporte, esplicó na Comisión de Facienda de la Xunta Xeneral les cuentes del so departamentu. La partida pa política llingüística sufre un recorte nuevu importante que criticó Foro con dureza.

La Empresa Municipal de Tresportes Urbanos de Xixón (EMTUSA) sigue utilizando la toponimia castellana, non oficial nel conceyu, nos sos autobuses. L’alcaldía comprometióse n’ochobre con Iniciativa pol Asturianu a iguar esta situación.

Esti miércoles va entamar una campaña d’encuestes a mayores de 14 años en 2.100 domicilios del país. L’oxetivu d’esta consulta, la tercera que se fai, ye obtener información sobre la salú de los asturianos de cara al Plan nuevu.

Inaciu Hevia Llavona resultó gallardonáu col V Premiu d’Ensayu y Trabayos d’Investigación Fierro Botas. El xuráu escoyó ‘La botella de Xixón. Oríxenes y desendolcu hestóricu de la botella de sidra d’Asturies’ como obra ganadora.

Un escritu anónimu unviáu a la Comisión qu’estudia’l casu de corrupción n’alministración asturiana denuncia delitos nuevos qu’afeutaríen a altos cargos del Gobiernu de Vicente Álvarez Areces. La mesa treslladólu a la Fiscalía del TSXA.

Uviéu acueye esti martes el tercer movimientu (‘adagio’) d’El Bardu Errante, personaxe aicionista que vien interautuando pelos espacios públicos y privaos de la ciudá dende ochobre. Ésti va tener llugar a les 14 hores na plaza’l Carbayón.

‘La Chelita. El Salvador 1992’ ye’l nome del trabayu últimu de Ruma Barbero. Trátase d’una novela gráfica desendolcada a partir de los testimonios de cooperantes y veteranos de la guerrilla, y centrada na figura de Charo, ‘La Chelita’.

Javier Antonio Marinas García llevóse’l IV Premiu Alfonso Iglesias de cómic en llingua asturiana por ‘Homes’. El xuráu del gallardón qu’entrega Cultura decidióse por unanimidá pol trabayu del dibuxante y diseñador nacíu en Grau.

José Ramón González ‘Rubio’, responsable de la empresa xixonesa Barnizados Unión, entamó esti llunes una fuelga de fame énte la sede de Feve en Madrid. Reclama a la entidá pública’l pagu d’una deuda de 75.000 euros.