Un estudiu del xixonés Hevia Llavona sobre la botella de sidra asturiana, premiu Fierro Botas 2012

Inaciu Hevia Llavona resultó gallardonáu col V Premiu d’Ensayu y Trabayos d’Investigación Fierro Botas. El xuráu escoyó ‘La botella de Xixón. Oríxenes y desendolcu hestóricu de la botella de sidra d’Asturies’ como obra ganadora.

L'etnógrafu xixonés algama con esti trabayu al rodiu d’un elementu cimeru de la cultura asturiana, como ye la botella de sidra, sobre’l qu’hai pocos estudios fechos, esti premiu prestixosu entamáu pola Conceyalía d’Educación, Cultura, Xuventú y Fiestes del Conceyu de Xixón pa recordar la figura del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002. El gallardón tien como recompensa 4.000 euros en metálico y la espublización de la obra.

El xuráu del premiu, presidíu por Xosé Nel Riesgo, direutor de la Fundación Municipal de Cultura, Educación y Universidá Popular, y formáu por Humberto Gonzali García, escritor y xestor cultural; Roberto González-Quevedo González, secretariu de l'Academia de la Llingua Asturiana; Jaime González Fierro-Botas, filólogu y representante de la familia Fierro Botas; Alberto Álvarez Peña, ganador de la edición anterior del Premiu Fierro Botas por ‘Mitoloxía de los santos n'Asturies. Raigaños paganos nel cristianismu'; y María Xosé Rodríguez López, responsable de la Oficina de Normalización Llingüística, que fixo de secretaria, concedió por mayoría’l gallardón a Hevia Llavona pa premiar “lo novedoso del tema, rescamplando sobremanera la conxugación que l’autor fai ente’l patrimoniu cultural y etnográficu, la cultura popular y la industria; asina como l’apueste que fai por dar al mundu una mayor conocencia de Xixón y d’Asturies”.