Pal segundu trimestre del 2013 Gonzali Producciones centrará los sos esfuercios en doblar la película checoslovaca ‘Vynález zkázy’, que n’asturianu llevará’l nome de ‘Inventu diábolicu’. Anguaño ta trabayando cola cinta ‘Charade’.
L’escritor entreguín Pablo Rodríguez Medina resultó ganador del XI Concursu de Narraciones Curties Conceyu de Llaviana pol so trabayu ‘L’alemán’. El segundu puestu foi pa Paula Pulgar Alves pol rellatu ‘Asia Box’.
Los discos últimos de Soncai System, Mariluz Cristóbal y Toli Morilla son les trés novedaes pa esti iviernu de L’Aguañaz, sellu integráu anguaño en Goxe Producciones. Trés estilos diferentes con un denominador común: l’usu del asturianu.
Esti 28 d’avientu, Día de los Santos Inocentes, la Coordinadora Ecoloxista d’Asturies falló, como ye vezu, la Bullada Purpurina. Nel 2012 esti gallardón negativu viaxó a Tapia, en concreto a la empresa minera Asturgold.
L’investigador y músicu tradicional Dani García de la Cuesta va interpretar esti xueves en Colunga, xunto con Pedro P. Sanjurjo y Laura Fernández, una pieza musical del 1721. Trátase d’un villancicu asturianu que’l tríu va tocar per primer vegada.
Esti vienres va tener llugar na Xunta Xeneral el Plenu d’alderique de les enmiendes parciales a los Presupuestos Xenerales d’Asturies presentaes pola oposición. El Gobiernu sacará alantre les cuentes del 2013 col sofitu d’IX y UPyD.
La Conseyería d’Educación, Cultura y Deporte anunció que va ponese en contautu col Ministeriu de Fomentu pa que replantegue la so oposición a utilizar los topónimos del país. La falta d’oficialidá del idioma ye la fonte d’esti problema.
El Ministeriu de Fomentu va caltener los nomes de llugar castellanos nes nueses carreteres. Que l’idioma nun sía cooficial ye, otra vuelta, l’argumentu utilizáu pa nun usar la toponimia tradicional y despreciar asina a los asturfalantes.
El ‘Conceyu Abiertu’ sobre’l futuru del asturianu presentó resultados mui asemeyaos en toles opciones. La más votada polos usuarios d’Asturies.com, con un 29 por cientu del total, ye que l’idioma, de siguir per esti camín, va desapaecer dafechu.
