Un autónomu xixonés anicia una fuelga de fame en Madrid pa reclamar a Feve’l pagu d’una deuda

José Ramón González ‘Rubio’, responsable de la empresa xixonesa Barnizados Unión, entamó esti llunes una fuelga de fame énte la sede de Feve en Madrid. Reclama a la entidá pública’l pagu d’una deuda de 75.000 euros.

L’autónomu xixonés utiliza esta forma de presión como alternativa última depués de meses reclamando unes perres que nun acaben de llegar y que tán llevando al so negociu, que lleva xunto a dos socios y nel que trabayen trés emplegaos, al borde del pieslle. «Voi poneme en fuelga de fame a la so puerta y llueu Dios dirá. Ya tán matándome, asina que pa matame equí, que me vean morrer ellí”, señaló Rubio la selmana pasada al anunciar les sos intenciones. El responsable de Barnizados Unión solicita’l pagu d’unos trabayos fechos nel tren de lluxu ‘Al-Andalus’ y que tamién afeuta a otres dos empreses de la ciudá. En total, el dineru reclamáu asciende a 114.000 euros.

Estes trés empreses foron subcontrataes por Fenit Rail, empresa en concursu d’acreedores participada en un 37,50 por cientu por Feve, según informa Asociaciones Federadas de Autónomos de Asturias (AFAS), que ta sofitando a Rubio na so reclamación. Dende Feve, en declaraciones feches a TPA, aseguren que yá fixeren el pagu a Fenit Rail y que los afeutaos han de reclamar les perres a l’alministrador concursal de la empresa que-yos contrató. Énte esta postura de la empresa pública, Rubio señaló que nunca se-y informó d’esti pagu y que Feve tien una reclamación de la so empresa dende’l 15 de xunu, polo qu’esixe que sía esta compañía la qu’abone la deuda reclamada.

Manuel Orviz, coordinador d’Izquierda Xunida, y Laura Sampedro, senadora xixonesa del PP, acompañaron a Rubio esti meudía nel entamu de la so fuelga de fame. Miguel Ángel Blanco, presidente de la Confederación Internacional de Autónomos de España (CIAE), acudirá mañana a la puerta de la sede madrilana de Feve p’amosar el so sofitu al xixonés.