‘La familia del asturianu crez’, el cantar del X Día de la Reciella

Yá ta equí, recién sacáu del fornu, el cantar del X Día de la Reciella. Lleva’l nome de ‘La familia del asturianu crez’ y de xuru que te suena’l so compositor, Nacho Fonseca, el creador de Seliquín y Xentiquina, que canta xunto cola so fía Esther y la so nieta Manuela simbolizando asina la tresmisión xeneracional del asturianu.

Un malvís, una gatina gris y un ratón son los protagonistes d’esti tema que nun va parar de sonar esti sábadu, 7 d’ochobre, nel Muséu del Pueblu d’Asturies, onde vamos poder disfrutar d’actividaes de toa mena n’asturianu. Tamién va proyeutase’l videoclip, nel qu’estos trés miembros de la familia Fonseca son protagonistes y apaecen con unes mázcares mui prestoses.

Queden yá mui pocos díes pa esta cita, una de les más esperaes del añu, pero yá puedes sentir el cantar nes plataformes dixitales, como YouTube, y deprender la lletra. El sábadu vamos cantala en comuña.