Día de la Llingua Materna: recursos nuevos pa trabayar na aula y en casa sobre esta xornada y l'idioma
![Recursos Día de la Llingua Materna 2023 Recursos Día de la Llingua Materna 2023](https://asturies.com/sites/default/files/recursos_dia_de_la_llingua_materna_2023.jpg)
Esti martes, 21 de febreru, celébrase’l Día Internacional de la Llingua Materna, una xornada que busca poner en valor la diversidá llingüística y que vien acompañada de delles actividaes pal públicu infantil. Educastur presenta amás esti añu la ferramienta ‘Recursos pal aula/Recursos pral aula’ con conteníos mui diversos n’asturianu y gallego-asturiano pa toles etapes educatives.
La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistanín –qu’ocupaba’l país– nuna manifestación en Dhaka pola defensa de la llingua bengalí. El primer Día Internacional de la Llingua Materna foi nel 2000 y, dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá.
Estos díes nes aules vienen trabayando esta xornada, qu’esti añu pon el focu na ‘Educación Multillingüe (EML), la necesidá pa tresformar la educación’ pa, ente otres coses, “revitalizar les llingües en vía de desapaición o en peligru de desaniciu”. N’Asturies el Día Internacional de la Llingua Materna celébrase col enfotu de rescamplar la importancia de la conocencia de llingües y concienciar sobre la responsabilidá de caltener la de nueso, l’asturianu o’l gallego-asturiano.
Pa ello les maestres y maestros cuenten con materiales nuevos con actividaes didáutiques pa toles etapes educatives asoleyaos pola Conseyería d’Educación n’Educastur ‘Recursos pal aula/Recursos pral aula’, accesibles pa tola ciudadanía nesti enllaz, qu’empleguen la ferramienta interautiva Genially. Un mapa de toles llingües europees, una infografía sobre’l Día de la Llingua Materna, frases y espresiones, pallabres o documentales son dalgunos de los preseos que pueden emplegar colos sos escolinos.
“El Día Internacional de la Llingua Materna celebra la diversidá llingüística como una pieza que fomenta la tolerancia y el respetu nes sociedaes”, apunten dende Educastur, que rescampla que “la reconocencia y respetu pola diversidá llingüística y cultural estraordinaria d'Asturies contribúi a fortalecer la unidá y la cohesión de la nuestra sociedá”. “El multillingüismu contribúi al desenvolvimientu de sociedaes integradores qu’afalen la coesistencia y l'arriquecimientu mutuu de múltiples cultures, visiones del mundu y sistemes de conocencia”, añaden.
Otros organismos, como la Oficina de Normalización Llingüística de Xixón, aprovechen la xornada pa presentar en redes sociales un dossier con cantares, llibros, programes y eventos en llingua asturiana porque “los primeros años de vida son claves nel deprendimientu d'una llingua, y esto tamién fai que se normalice l'usu del asturianu dende'l nacimientu”.
L’Infiestu, Noreña y Cangas del Narcea
Política Llingüística tamién quier conmemorar esta fecha tan simbólica, pa lo que programa actividaes d’artes plástiques, teatru y talleres empobinaos al públicu infantil “cola mira de reivindicar la importancia y la riqueza que l’asturianu y l’eonaviegu representen dientro de la cultura asturiana”. La primera tuvo llugar ayeri, Llunes d’Antroxu, en Piloña, na Casa Cultura de L’Infiestu a les 17 hores, y va consistir nun taller sobre les mazcaraes d’iviernu de la mano d’Aladanza Educación y Tradición.
Pa esta tarde, Día de la Llingua Materna, va representase en Noreña, a les 18 hores na Casa Cultura, la obra de marionetes ‘Les aventures del cuélebre tragón’, a cargu d’Elisabet Martín Teatro. Tamién va haber teatru mañana, a les 20 hores, nel Teatru Toreno de Cangas del Narcea, col ‘Quixote’ de Carlos Alba.