Los capítulos de ‘Animalada Xabaz’ tornen a la pantalla de TPA

La cabra Telva, el xabaril Xuacu y la osa Sabela –falante de gallego-asturiano– tornen a la pantalla xunto col restu de personaxes de ‘Animalada Xabaz’. TPA repón dende esti sábadu esti programa infantil n’asturianu que s’estrenó na Selmana Santa del 2021.

A les 9.20 hores ta marcada na programación de TPA el reestrenu de los ochos capítulos que produxo Covenant Audiovisuales al ser escoyíu esti proyeutu na convocatoria ‘Asturies crea cultura / Asturies crea sinerxes’ entamada pola Conseyería de Cultura, Política Llingüística y Turismu y RTPA pa la ellaboración de conteníos n’asturianu nel ente públicu de comunicación. Una serie que tuvo un bon recibimientu ente les neñes y neños asturianos, y tamién ente los mayores, lo que nun valió pa que s’encargaran más episodios.

Cada programa tien 25 minutos de llargor, cola previsión d’emitise los sábados, y tienen como filo conductor un cuentu tradicional asturianu. Tamién hai espaciu pa la música y pa deprender llingua asturiana al traviés de les entrugues d’Enol a Fefa.

Otra manera, tolos capítulos de 'Animalada Xabaz' tán disponibles na estaya 'A la carta' de la web de RTPA.

Na semeya, Xuacu, Sabela y Telva.