La Cruz de los Anxeles
La Cámara Santa de la catedral d’Uviéu, nomada de San Salvador, guarda les ayalgues y reliquies depositaes nel templu. Una de les principales ye la Cruz de los Ánxeles, símbolu d’Uviéu yá dende’l sieglu XV, polo que ta presente nel escudu de la ciudá.
Ye una donación al conxuntu catedraliciu uvieín conformáu pola ilesia de San Salvador y la ilesia de Santa María por parte del rei asturianu Alfonso II el Castu a lo primero del sieglu IX. Una inscripción al aviesu de la cruz fecha esta aición nel añu 808.
La Cámara Santa, Catedral d'Uviéu.
Sobre’l so orixe, desconocíu, hai delles versiones. Una lleenda del sieglu XI diz que foron dos ánxeles vistíos como pelegrinos que visitaron a Alfonso II los que fixeron la cruz, que se carauteriza por nun tener la tipoloxía nin la téunica d’ellaboración habitual naquellos tiempos.
Otres fontes atribúyenla a artistes bizantinos o lombardos de tradición bizantina desplazaos a Uviéu, quiciabes por voluntá del emperador Carlomagno pa trabayar pal monarca asturianu. Lo único cierto ye que ye la primer pieza d’orfebrería asturiana prerrománica que se conserva.
La Cruz de los Ánxeles.
Tien forma de cruz griega, con un llargor cuasi idénticu de los sos cuatro brazos, formada por dos pieces de madera de cerezal cubiertes por llámines d’oru y piedres precioses. Les sos midíes son 46,5 metros del altor, por 45,5 d’anchu y 2,5 de grosor, y agora espónse xunto con dos ánxeles modernos pa da-y una imaxe asemeyada a la que tenía nun entamu.
Tampoco se conoz a ciencia cierta’l so usu concretu, anque hai consensu en que s’emplegó como relicariu, al contar pequeñes caxes nos brazos onde guardar reliquies, y como cruz procesional. A lo llargo de la so historia vivió dos episodios que la punxeron en peligro: na Revolución d’Ochobre del 1934 sufrió desperfeutos por una voladura de los revolucionarios a la Cámara Santo, lo qu’obligó a restaurala nel 1942, y nel 1977 foi robada, siendo recuperada y otra vegada restaurada al tar mui dañada, lo que fixo que nun pudiera tornar al so sitiu hasta’l 1985.
- ¿Por qué ye importante la Cruz de los Ánxeles?
- ¿Qué carauterístiques tien?
- ¿Quién la creó?
- ¿Ónde se guarda y con qué otres reliquies convive?