Martes de Campu
Si yes d’Uviéu de xuru que ye una folixa que celebres tolos años cola to familia, y si nun lo yes sentiríes falar d’ella en más d’una ocasión. Tratáse del Martes de Campu, una fiesta con munchos años de tradición: conmemora un fechu que tuvo llugar nel sieglu XIII.
Balesquida Giráldez ye la protagonista d’esta historia d’arrogancia. Dexó una donación a los sastres y probes de la ciudá consistente nun hospital con 10 camas, asina como dellos bienes inmuebles, que certificó nun testamentu nel 1232.
Creese qu’esta muyer yera d’orixe francu –n’Uviéu esistía una pequeña comunidá de persones d’esta procedencia que llegó pola actividá socio-económica xenerada pola presencia na ciudá de les reliquies de la catedral– y, anque’l so nome popular anguaño ye Doña Balesquida, llamábase Velasquita. Pertenecía a una familia adinerada y heredó del so padre, Giraldo Pérez, numberosos bienes xunto colos sos hermanos.
N’Uviéu quedó pa la posteridá poles sos donaciones, siendo la más conocida la fecha a la Cofradía de los Sastres instituyida o fundada por ella pa recibimientu de los probes. Como contraprestación, los cofrades hubieron pagar cada añu 15 maravedís a un cura de Santiso’l Real pa qu’entame cada añu una misa pol descansu de Doña Balesquida.
Esa mesma cofradía llegaría hasta los nuesos díes como La Belesquida Antigua Cofradía de Nuestra Señora de La Esperanza, non ensin dificultaes, como nel 1929, cuando tuvo cerca del so desaniciu, pero la creación nel 1930 de la Sociedad Protetora de La Balesquida p’ayudala y protexela permitió la so sobrevivencia. Dende enantes del sieglu XV celebraba’l martes de Pentecostés con una procesión a la ermita de la Nuesa Señora de Mexide, nel barriu d’El Fresno, y, llueu de la celebración de solemne misa cantada, entregábase a los cofrades como xinta “un bollu de media llibra de pan d’escanda, torrednu y mediu cuartín de vinu de pasao’l monte”.
Anguaño d’esa celebración queda delles celebraciones relixoses nos díes previos al Martes de Campu, xornada na que se llee’l pregón, se celebra misa na capiella de La Balesquida y se reparte’l bollu y una botella de vinu nel Campo San Francisco. Ehí xúntense miles de persones pa celebrar esta fiesta, tamién n’otres zones verdes de la ciudá, nun día mui especial pa uvieínes y uvieínos.
- ¿Qué celebra’l Martes de Campu?
- ¿En qué consistió la donación de Balesquida Giráldez?
- ¿D’ónde proceden los francos?
- ¿Qué ye lo que se come’l Martes de Campu?