La historia ‘Boliescritu de primavera’ yá tien llibru

La obra ganadora del XIV Premiu María Josefa Canellada de lliteratura infantil y xuvenil, correspondiente al añu 2021, yá tien llibru. Impronta edita ‘Boliescritu de primavera’, la historia que nos regala Xilberto Llano, que va presentar la so creación esti vienres n’Uviéu.

Un grupu de neños y neñes que nagüen cola llegada de la primavera pa poder salir col bon tiempu viven nun edificiu a siete andares con átigu, un baxu con locales y dos suétanos d’aparcaderu. De sópitu, enfréntense a una invasión estraterrestre que-yos obliga a quedar en casa, lo que, ensin querer, fai descubrir secretos invisibles.

D’esta forma, Llano trata d’una forma amable’l confinamientu que vivimos nel 2020. Nel so treslláu a llibru, la historia vese perbién completada poles ilustraciones de Francisco Pimiango.

Recién salíu d’imprenta, ‘Boliescritu de primavera’ va presentase esta tarde, a les 19 hores, nel salón d’actos de la Biblioteca d’Asturies ‘Ramón Pérez de Ayala’. L’autor va tar acompañáu pol tamién escritor Aique Fernandi nun eventu al que tien confirmada la so asistencia Antón García, direutor xeneral de Política Llingüística.

Na nuesa Biblioteca pues atopar la ficha d'esti llibru.