‘La sierva patrona’ de Nun Tris pon el ramu a les representaciones pol VI Nel Amaro

El Teatru Filarmónica va xubir per última vez el telón del VI Premiu y Festival Nel Amaro de Teatru Profesional en Llingua Asturiana y Gallego-asturiano cola representación de ‘La sierva patrona’. La obra de Nun Tris Producciones ye la cuarta finalista d’esti gallardón qu’esti añu miró pa histories empobinaes al públicu infantil y mozu.

Ópera en formatu pequeñu basada en ‘La serva padrona’, con música de Giovanni Battista Pergolesi y llibretu n’italianu de Gennaro Antonio Federico estrenada nel 1733 en Napule, propón un argumentu cenciellu: un xuegu amorosu simpáticu ente una criada y el so vieyu patrón, que resulta burlláu pola primera. Como obra dirixida a un públicu familiar, ye una propuesta amable, d’espíritu humorísticu y llixeru y que se val de la cencellez na propuesta escénica, na qu’intervienen bien pocos personaxes y na que nun son necesarios grandes entueyos escenográficos.

Vanessa del Riego (Serpina), Óscar Hernando (Uberto) y Inma Rodríguez (Vespone) son los artistes sobre les tables. Mario Álvarez pon la música al pianu y Antón Caamaño encárgase de la direición n’escena y de les diferentes versiones de ‘La sierva patrona’.

La función va entamar a les 18 hores nel uvieín Filarmónica, con entrada llibre hasta completar aforu. Con ella complétase la fase de festival del Nel Amaro, quedando pendiente namái’l fallu del xuráu, que pudo ver en direuto previamente a los otros trés finalistes.