Escolinos d’Avilés soliciten la instalación d’un Ramu de Nadal nuna plaza p’ayudar a recuperar esta tradición navidiega

Queda poco más d’un mes pa Navidá y les villes asturianes yá tán preparando la decoración pa estes feches. N’Avilés, les escolines y escolinos de quintu de Primaria del CP Marcelo Gago convocaron a conceyu abiertu a instituciones y coleutivos pa pidir la instalación d’un Ramu de Nadal nuna plaza de la ciudá qu’ayude a poner en valor y recuperar esta tradición asturlleonesa.

A lo llargo del cursu investigaron les tradiciones asturianes del solsticiu d’iviernu, como’l nataliegu o los aguilandos, observando que se tán desaniciando, esborrándose adulces de la memoria coleutiva. Tamién el Ramu de Nadal o de Navidá, col que se decidieron centrar esti añu.

Nació asina’l proyeutu de participación infantil ‘El Ramu Nadal: pasado, presente y futuro’ cola ilusión de que se convierta nun elementu decorativu presente en dalguna plaza pública d’Avilés, adornando y aguapeciendo la Navidá avilesina. Nes selmanes últimes unviaron cartes a instituciones y coleutivos pa llamalos a conceyu abiertu, convocáu pal miércoles a les 10 hores nel salón d’actos de la escuela, y buscar soluciones conxuntes que permitan recuperar esta tradición.

Confirmaron hasta’l momentu la so asistencia la conceyala de Promoción Social, Nuria Delmiro; Rubén Arias, xerente de Festexos; María Sánchez, presidenta del AFA; José Federico Álvarez Palacios, presidente de Xuntanza d’Avilés; l’Asociación de Vecinos del Polígono de la Magdalena; y el direutor del colexu, Javier Sarasola, asina como l’alumnáu y el profesoráu del centru. L’alderique va enfocase na busca de soluciones y compromisos compartíos pa poner en valor el Ramu de Nadal.

Na semeya en primer planu, un Ramu de Nadal instaláu nel avilesín CP Palacio Valdés en Navidaes pasaes.