Castro Gión recibió’l Premio Quiastolita de Lliteratura Infantil en gallego-asturiano
![Gonzalo Asenjo, Cecilia Pérez Sánchez, Antón García y Alberto Castro Gión I Premio Quiastolita Gonzalo Asenjo, Cecilia Pérez Sánchez, Antón García y Alberto Castro Gión I Premio Quiastolita](https://asturies.com/sites/default/files/gonzalo_asenjo_cecilia_perez_sanchez_anton_garcia_y_alberto_castro_gion_i_premio_quiastolita.jpg)
El Parque Histórico del Navia fixo entrega esti xueves del I Premio Quiastolita de Lliteratura Infantil en gallego-asturiano. El so ganador foi Alberto Castro Gión, que presentó’l trabayu ‘Bandeira moura’, que podría espublizase nun futuru xunto con otros cuentos.
Antón García, direutor xeneral de Política Llingüística, desplazóse hasta Navia pa participar nel actu celebráu nel Espacio Cultural Liceo, onde tuvieron presentes l’alcaldesa d’El Franco, Cecilia Pérez Sánchez, y el conceyal de Cultura de Navia, Gonzalo Asenjo. Castro Gión recibió’l diploma acreitativu d’esti gallardón nel que collabora’l Gobiernu, ún de los dos de creación nueva en gallego-asturiano d’esti añu xunto col Premio Ría del Eo de Poesía en Galego-asturiano, y una recompensa de 1.500 euros.
L’autor naviego, que tien en proyeutu una novela qu’espera retomar en branu, presentó a esti gallardón ‘Bandeira moura’, valoráu pol xuráu por “a súa adecuación pral público d’edá infantil, a orixinalidá del trabayo y as muitas referencias históricas, os recursos lliterarios usaos y a capacidá de conectar col público infanti”. Les autoridaes albidren llevar esti cuentu a un llibru nun futuru xunto a otres creaciones en gallego-asturiano d’esta edición o de les próximes.
Na semeya, Asenjo, Pérez Sánchez, García y Castro Gión.