La obra infantil 'Grana de cardamomu' abre’l V Festival Nel Amaro
!['Grana de cardamomu', d'El Callejón del Gato 'Grana de cardamomu', d'El Callejón del Gato](https://asturies.com/sites/default/files/grana_de_cardamomu_del_callejon_del_gato.jpg)
El V Premiu y Festival Nel Amaro de Teatru Profesional en Llingua Asturiana o Gallego-asturiano entra esti ochobre na so fase de representación, abierta al públicu, nel que xuráu pue ver en direuto a les cuatro obres finalistes. El Callejón del Gato ábrela esti vienres nel uvieín Teatru Filarmónica con ‘Grana de cardamomu’.
Cuenta la historia d’Estrella y la so madre, que tán acabantes de dir a vivir al pueblu, a la vieya casa familiar. Celebra’l so cumpleaños y recibe una carta bien especial: si quier atopar los sos regalos va tener que solucionar una cosadiella, comezando asina una aventura na que va consiguir un puñáu de grana de cardamomu.
Ana Eva Guerra y Moisés Gutiérrez son los autores d’esta obra, que tamién dirixen y protagonicen xunto a l'actriz Paula Mata, con traducción al asturianu de Vicente García Oliva. Va representase a les 20 hores, con entrada llibre hasta completar aforu.
Los trés siguientes vienres, nel mesmu llugar y a la mesma hora, van defender la so propuesta, nesti orde, Nun Tris Producciones, que presenta ‘La reina de la guapura de Leenane’; Factoría Norte, cola tamién obra infantil ‘Les piripiripirates con parches y a lo xole’; y José Rico Arte Producciones, que trai ‘Setiembre’. La compañía ganadora d’esti certame entamáu pola Conseyería de Cultura, Política Llingüística y Turismu pa “consolidar, arriquecer y prestixar la llingua asturiana y el gallego-asturiano nel ámbitu del arte dramáticu” lleva una recompensa de 6.000 euros.