Xilberto Llano merez el XIV Premiu María Josefa Canellada por ‘Boliescritu de primavera’
![Obres ganadores del Premiu María Josefa Canellada de lliteratura infantil y xuvenil Obres ganadores del Premiu María Josefa Canellada de lliteratura infantil y xuvenil](https://asturies.com/sites/default/files/obres_ganadores_del_premiu_maria_xosefa_canellada_de_lliteratura_infantil_y_xuvenil.jpg)
El fallu del XIV Premiu María Josefa Canellada de lliteratura infantil y xuvenil pieslla los Premios Lliterarios 2021 clásicos, a la espera de la convocatoria de los dos gallardones nuevos. El ganador ye Xilberto Llano, que presentó la obra ‘Boliescritu de primavera’ a concursu.
La Casa Conceyu de Cabranes acoyó la xunta del xuráu, que tuvo formáu pol alcalde, Gerardo Fabián; Alonso Zamora Canellada, familiar de l’autora que da nome al gallardón; les escritores Alba Carballo y Iris Díaz Trancho; Penélope Miranda, responsable del Serviciu de Normalización Llingüística de Ḷḷena; y Inaciu Galán, profesor y escritor coautor de la obra ganadora de la pasada edición xunto con Vero Suari, de nome ‘La curuxa Catuxa’, con Antón García, direutor xeneral de Política Llingüística, como presidente y Laura Marcos, filóloga de la direición xeneral, como secretaria. Nel acta rescampló “el tratamientu del tema del confinamientu de 2020 dende una perspectiva orixinal y ensin cayer en tópicos” fechu pol autor de ‘Boliescritu de primavera’, que resultó ser Llano, amás de la so “alta calidá lliteraria y el bon usu de la llingua asturiana”.
Nacíu n’Arroes nel 1965, ye llicenciáu en Filoloxía Hispánica pola Universidá d'Uviéu y profesional de biblioteconomía, y tien l’honor se ser el primer ganador, nel 1995, del Premiu Xuan María Acebal de poesía gracies a ‘Silabariu’. Enantes llevaba, nel 1987, el VIII Premiu de Novela Xosefa Xovellanos con ‘De Corinto de Grecia’.
Na so trayeutoria tien publicao llibros infantiles, la novela ‘Sencia’ (1998) y les traducciones ‘Alicia nel país de les maravíes’ (1989) y ‘L’otru llau del espeyu y lo qu’Alicia atopó ellí’ (1992) de Lewis Carroll, ‘El relatu d’Arthur Gordon Pym’ (1991) d’Edgar Allan Poe o 'El bollu los vienres' (1998) de Patxi Zubizarreta, ente otros munchos títulos.
Variedá y calidá
El xuráu del María Josefa Canellada destacó tamién “el nivel xeneral de calidá de les obres presentaes y la diversidá de perspectives qu'aborden”. Ésti ye l’últimu gallardón de los cinco Premios Lliterarios clásico que se falla, quedando pendiente agora la convocatoria del I Premiu Florina Alías a la meyor traducción al asturianu y el I Premiu Enriqueta González Rubín de narrativa moza.
Amás de Llano, los ganadores d’esta edición son Ángel de la Calle, con ‘Paez que nun foi ayeri’ (XIII Premiu Alfonso Iglesias de cómic); Pablo Texón, con ‘Cantar de ti mesma’ (XXVII Premiu Xuan María Acebal de poesía); Ramón d’Andrés, con ‘Una ciencia ensin enfotu’ (XXVII Premiu Máximo Fuertes Acevedo d'ensayu); y José Ángel Gayol, con 'La cafiante muerte de Nicolai Bostov' (XLII Premiu Xosefa Xovellanos de novela).
Na semeya, dalgunes de les obres ganadores del Premiu María Josefa Canellada de lliteratura infantil y xuvenil.