‘Lleer presta’: 4.000 exemplares pa les biblioteques de les escueles
![Obres ganadores del Premiu María Josefa Canellada de lliteratura infantil y xuvenil Obres ganadores del Premiu María Josefa Canellada de lliteratura infantil y xuvenil](https://asturies.com/sites/default/files/obres_ganadores_del_premiu_maria_xosefa_canellada_de_lliteratura_infantil_y_xuvenil.jpg)
La Conseyería de Cultura, Política Llingüística y Turismu entama la campaña de distribución de llibros n'asturianu y gallego-asturiano entitulada ‘Lleer presta’. Los primeros destinatarios son 301 centros educativos del país, que van recibir 4.000 exemplares esti mes.
Estes obres proceden de los sos fondos bibliográficos y van pasar a formar parte de les biblioteques escolares. La Direición Xeneral de Política Llingüística priorizó la escoyeta y donación de los llibros n’asturianu y en gallego-asturiano en función del ámbitu d’usu d’estes llingües en Primaria y Secundaria.
Los títulos van llegar a lo último d’esti mes, mentes que la campaña va siguir l’añu qu’entra con unvíos a les biblioteques dependientes del Gobiernu y a les municipales. L’oxetivu d’esta iniciativa ye sofitar la enseñanza y el deprendimientu n’asturianu y gallego-asturiano.