Ilesia d'Abamia
Anque pueda paecer a priori una ilesia más de les munches esistentes nos pueblos d’Asturies, la d’Abamia ye enforma especial. Nella reposaron mientres sieglos los restos de Pelayo, el primer rei d’Asturies, y la so muyer Gaudiosa, lo que confier a esti templu una gran importancia histórica, anque dalgunos estudios nieguen esta idea con raigón na tradición.
Diz la lleenda que foi’l propiu Pelayo’l que mandó construyir en vida esta ilesia qu’anguaño tien aspeutu románicu, datada nel sieglu XII. Sicasí, sábase que la so construcción foi anterior, con documentos del VIII que la nomen.
Ilesia d'Abamia
Nel llau de la Epístola actual de la ilesia d’Abamia sería onde s’enterraron los restos de Pelayo, conservándose anguaño’l sepulcru, mientres qu’enfrente, al llau del Evanxeliu, los de Gaudiosa. Nun primer momento, dambos taríen fuera, arrimaos al templu, pa pasar al interior tres una ampliación posterior del templu.
Sería más alantre, nel sieglu XIII, cuando Alfonso X de Castilla mandaría llevar los restos del monarca asturianu a Cuadonga, onde siguen anguaño. En concreto, reposen na Santa Cueva, a pocos metros de la Santina, nun túmulu de piedra xunto colos de Gaudiosa y los d’Ermesinda, hermana del monarca.
Portada sur: diañu arrastrando a una persona.
No arquiteutónicu, l’ilesia d’Abamia, d’una sola nave, destaca pola so portada sur. Nella atopamos capiteles con escenes sobre’l Xuiciu Final y la resurrección de los muertos, sobresaliendo la del diañu arrastrando pelos pelos a una persona, que según la tradición podría representar la figura del obispu toledanu Oppas, que pretendió la rendición de Pelayo frente a los musulmanes según la Crónica d’Alfonso III.
Nel cementeriu apegáu al templu enterróse a Roberto Frasinell (1811-1887), conocíu como l’alemán de Corao. Foi un arqueólogu y dibuxante que s’afincó na zona y que destacó por realizar los diseños de la basílica de Cuadonga y por descubrir el dolmen d’Abamia, anguaño desapaecíu conservándose un ortostatu figuráu del mesmu en Madrid, nel ‘Museo Arqueológico Nacional’. Los sos restos reposen na parte posterior izquierda de la nave de la ilesia dende’l 1977.
- ¿Por qué ye importe la ilesia d’Abamia?
- ¿Qué pasó colos restos de Pelayo dende la so muerte?
- ¿Qué elementu arquiteutónicu destacaríes del templu?
- A parte de por Pelayo, ¿por qué otru motivu tien esta ilesia rellación con Cuadonga?
Pon n’orde cronolóxicu a estos primeros monarques asturianos: