Monumentos megalíticos n'Asturies

1 Avientu, 2019
Pablo R. Guardado

Asturies ye un territoriu ricu en monumentos megalíticos. Éstos correspuenden al Neolíticu mayormente (7.000-3.000 enantes del presente), últimu periodu de la Edá de Piedra, nel que los humanos comenzaron a prauticar l’agricultura y el pastoréu, provocando l’apaición de les primeres sociedaes sedentaries.

Pero, ¿cómo ye un monumentu megalíticu? Trátase d’una estructura fecha con piedres pergrandes y ensin trabayar llevantaes principalmente pa usu funerariu, casu de los dólmenes y los túmulos, les formes más abundantes n’Asturies, dándose n’otros llugares otres como los menhires o l’alliniamientos.

Túmulu nel Monte Areo (Xixón)

¿Sabíes qué…? Esisten estructures megalítiques mui asemeyaes a les asturianes en territorios tan llonxanos como Éire.

Un túmulu ye una sepultura allombada que llevanta del suelu. Conformen montículos artificiales, yá que los dólmenes sobre los que se llevantaba yeren cubiertos de tierra y piedra que, en munchos ocasiones, col pasu del tiempu quedaron al descubiertu dexando al aire la so estructura: piedres verticales que soporte el pesu d’otra o otres horizontales.

Estes edificaciones quedaben nel so orixe como una cueva artificial que facía de sepulcru, llevantándose edificaciones simples o más complexes, como los de corredor, que facíen un pasiellu d’accesu a la zona d’enterramientu coleutivu. N’Asturies son numberosos los túmulos y dólmenes de los dos tipos esistentes a lo llargo de tola nuesa xeografía.

Túmulu nel Monte Deva (Xixón)

¿Sabíes qué…? En Cangues d’Onís hai un dolmen, el de Santa Cruz, sobre’l que construyó una ilesia en tiempos del rei asturianu Favila. Pa visitalu hai qu’entrar nel templu que se llevantó nel llugar tres la Guerra Civil y que sustituyó a ún valtáu del 1632.

Entes los monumentos megalíticos asturianos destaquen el de Merías, nel conceyu de Tinéu, o los dos conservaos del conxuntu del Cantu les Cruces, nel cordal ente Ayer y Ḷḷena, anque son visibles numberosos restos nel llugar. El pocu enfontu dende les alministraciones y la poca conciencia de la población sobre’l valor d’estes edificaciones faen que dalgunes tean en seriu peligru o sufran situaciones surrealistes, como asocedió col de la Llastra la Filadoira, n’Eilao, onde dalguien pintó “coto privado de caza’.

Na costa tamién atopamos esti tipu de construcciónes, siendo la del Monte Areo, en Xixón, una de les necrópolis meyor conservaes. Anque conocíos dende enantes, foi nel 1990 cuando s’investigó al respeuto, afayando trés decenes de dolmenes, destacando el San Pablo y el del Llanu.