La noticia del escaezu del asturianu de la diputada popular María Gloria García, la más vista del 2019 n’Asturies.com

Yá llego’l 2020, y como venimos faciendo estos años, n’Asturies.com estrenamos el nuevu repasando les noticies más vistes de los 365 díes pasaos. El misteriosu escaezu del asturianu de la diputada mierense del PP María Gloria García Fernández nun añu y mediu foi la que más interés xeneró ente los nuesos llectores.

Foi’l 1 d’ochobre cuando se vivió un episodiu “humildante” na Xunta Xeneral, como lu calificó Berta Piñán, conseyera de Cultura, Política Llingüística y Turismu, protagonista involuntaria del mesmu. A los 25 segundos d’empezar la so intervención na comisión pa informar sobre’l so proyeutu de Gobiernu foi interrumpida por García Fernández: “Disculpe señora presidenta, pido amparo a la mesa. Quería saber si la señora consejera va hacer su intervención en asturiano al completo”.

La respuesta de Piñán foi nidia: “Sí, ésa yera la mio intención, sí”. La mierense reaicionó entós solicitando que se suspenda “la sesión y se me facilite traducción simultánea”, entrando darréu n’aición Ignacio Blanco, diputáu de VOX, nun situación surrealista de la qu’informó en direuto Asturies.com dende la Xunta Xeneral.

Al día siguiente, esti mediu dixital informaba de ‘El misteriosu casu de la diputada qu'escaeció l'asturianu n'añu y mediu’. Foi’l tiempu que pasó dende que García Fernández participara na llectura institucional del Parllamentu asturianu con motivu de la Selmana de les Lletres Asturianes, emplegando na so intruducción precisamente l’asturianu: “Bonos díes. Voi lleer un poema cortín y perguapu de Berta Piñán. Llámase 'Mentires piadoses”, siguió.

Les otres 9 con más entraes

La protagonizada pola diputada popular foi la noticia más vista nel 2019, pero na llista siguiente va poder conocer los otros nueve artículos más lleíos d’esi añu al tiempu que-y deseamos un perbón 2020 nel qu'Asturies.com va siguir siendo fiel a la cita diaria cola información d'Asturies y del mundu.

1. El misteriosu casu de la diputada qu'escaeció l'asturianu n'añu y mediu
2. Los ataques de Casado a la llingua y cultures asturianes provoquen una fola nueva de reaiciones n’Asturies
3. “Asturies pierde al so meyor músicu; tenía un nivel interpretativu mui altu y un gustu esquisitu”, afirma Ambás
4. Una tesis doctoral sobre la evolución histórica d’Ayande ye la primera n’asturianu de la Facultá d’Historia
5. ‘¡Préstame pola vida!’ yá ye viral
6. Aitor García Corte nun escarta esportar la marca ‘Asturianistes’ fuera de Bimenes “pero primero queremos centrar el gobiernu nuevu”
7. Valdés cuestiona la Llei d'Usu y pide la vuelta de los topónimos non tradicionales
8. Asturies prepárase pa la Nueche d’Ánimes
9. La Xunta Eleutoral anula la candidatura d'Independientes de Morcín pal 26-M
10. “Si ames verdaderamente la to llingua, respetarás y amarás toles demás”, asegura l'abadesa de Les Pelayes na presentación de la ‘Riegla de San Benitu’