Los ataques de Casado a la llingua y cultures asturianes provoquen una fola nueva de reaiciones n’Asturies

|
Pablo Casado n'Uviéu horros y frixuelos

Yá lo fixera en payares depués d’afirmar n’Almería que’l PSOE quier imponer “el bable, que nadie habla en Asturias”, y tornó a repetilo depués del so ataque a la llingua y cultures asturianes del vienres. Asturies reaicionó a les pallabres de Pablo Casado, dende coleutivos a ciudadanos pasando por políticos, como l’ex presidente Antonio Trevín, que defendió en redes sociales la oficialidá del idioma.

La visita del popular a Uviéu pa presentar a los candidatos del partíu a Asturies y al conceyu dexó dellos titulares. Sicasí, el que más repercusión tuvo foi’l que se refirió tanto a la cultura como a la llingua asturiana, con una gran cantida de reaiciones que, como ye habitual nestos tiempos, tuvieron ecu sobre manera en redes sociales.

En primer llugar reclamó una “educación en llibertá y de calidá, na que los neños d’Asturies nun tean estudiando simplemente los horros y los frixuelos, sinón que tamién estudien qu’Asturies ye tamién tierra de Xovellanos, y qu’Asturies ye tierra d’Argüelles, y qu’Asturies ye tierra histórica de toda España”. Darréu refugó la cooficialidá afirmando que “naide nun la reclama”, “nun ta en riesgu” y “nun aporta beneficios a la sociedá asturiana”.

Unes pallabres qu’arrancaron los aplausos de los presentes, líderes del PP n’Asturies y militantes, y que llevaron la indignación a la mayor parte de la ciudadanía. Asina, nun tardaron n’abondar respuestes a Casado tanto en declaraciones públiques y nes redes sociales, onde les semeyes de frixuelos –la mayor parte recién fechos– foron el recursu más emplegáu p’amosar el descontentu.

“Equivócase”

Foi’l casu del socialista Trevín, presidente del país ente 1993 y 1995, que nuna entrada amplia en Facebook aseguró que Casado “equivócase” cuando “cree que nes nueses aules de dedica más tiempo a los horros y los frixuelos qu’a la ilustración”. “Los neños asturianos, en xeneral, lleguen a la escuela yá ‘enseñaos de casa’ sobre frixuelos y horros. A Xovellanos y Argüelles dediquen  los profesores, cuando toca, muncho mayor esfuerciu. Pue quedar tranquilu”.

Darréu apunta que “tampoco lu informaron bien sobre l’asturianu” y asegura que l’idioma “sí ta en riesgu”. “A los más de 200.000 falantes del asturianu o del gallego asturiano (la fala), la nuesa Constitución concede-yos el derechu de que la so realidá tenga caráuter oficial. Regulándola pa favorecer, non pa imponer”, polo qu’afirma que “la próxima Xunta Xeneral tien la obligación ética, moral y política d’impulsar un modelu llingüísticu exemplar pa toda España”.

Dende Podemos, el secretariu xeneral Daniel Ripa aseguró ayeri en Valdesoto, onde se celebraba'l Domingu de Sidros y Comedies, que les declaraciones de Casado dexaron a los integrante de la formación “plamaos”. “En llugar de defender el valor de lo qu’Asturies aporta, atopámonos con un cosmopaletismu que fai de menos una cultura que va del mundo rural hacia l’Estáu y l’ámbitu internacional. A Casado presta-y lo que se toma nes terraces de Madrid y los másteres que se dan a deu en ciertes universidaes y valora mui poco una cultura mui rica que recueye sieglos de tradición”, apuntó pa depués señalar que “hai que defender la cultura y les tradiciones asturianes”.

“Exhibición d’inorancia”

La Xunta pola Defensa de la Llingua Asturiana nun tardó n’asoleyar un comunicáu depués de conocer les declaraciones del presidente del PP. “Faló d'una ‘imposición de la cooficialidad por decreto que nadie reclama’. Parez inorar partes esenciales del ordenamientu xurídicu del Reinu d’España: el reconocimientu de la oficialidá nun pue facese por decretu, sinon pela via d’una reforma del Estatutu d’Autonomía, pa la que ye necesaria una mayoría ampliada de tres quintes partes de la representación de la Xunta Xeneral”.

La organización pide al PP “qu'esplique a los asturianos el motivu pol que d’ente toles llingües del Estáu namás s’oponen a la oficialidá de la llingua asturiana, mientres sí la apoyen en toles demás comunidaes con llingua propia diferente del castellanu: Galicia, País Vascu, Navarra, Cataluña, Valencia y les Isles Baleares” y “por qué merecemos menos derechos que los que se reconocen al restu ciudadanos del Estáu. Y si les propuestes del Partido Popular p’Asturies pasen por siguir forzando a la mocedá asturiano a siguir emigrando a eses comunidaes más prósperes onde, precisamente, sí tienen reconocida la oficialidá de les sos llingües”.

Tamién espublizó una nota l’Asamblea Moza d’Asturies (AMA), que considera “inaceptable que lo único que-y esmoleza a Pablo Casado sía que ‘los niños asturianos no estudien sólo hórreos y frixuelos’ cuando los problemes qu’atravesamos como mozos na nuesa tierra son munchos y enforma graves, tanto que deberíemos falar d’alarma social”. “Nun toleramos leiciones morales y de sacrificiu de dalguien al que se lo regalaron too y nun entiende de nengún mou’l gran esfuerciu que los y les moces asturianes xunto a les nueses familias hemos de facer pa estudiar. Si quier falar d’estudiantes y d’estudiar con un poco de dignidá y llexitimidá, pidimos-y qu’enantes renuncie al máster regaláu”, añade.

Tamién fai referencia a la crítica al idioma señalando que “si Pablo Casado conociera realmente la realidá de la mocedá asturiano, entendería que l’asturianu nun ye una cuestión de ‘imposición’ como diz”, recordando que “el 86 por cientu de los y les moces asturianes sofítenla”.  “La oficialidá nun xenera división, tolo contrario, ye un consensu de tola sociedá asturiana, por eso nun debería de ser oxetu de cuestionamientu políticu, como s’amuesa con esti tipu d’afirmaciones que sólo fomenten la intolerancia, l’odiu y el despreciu hacia la nuesa cultura y la so xente. Estudiaremos horros y frixuelos, y tolo que faiga falta pa conocer, amar y poder vivir na nuesa tierra”, sentencia esti coleutivu de xente mozo.

En Twitter, tamién se vieron numberoses y orixinales respuestes tanto de ciudadanos como de políticos. He equí una pequeña amuesa:

Contador Estadistiques