Aitor García Corte nun escarta esportar la marca ‘Asturianistes’ fuera de Bimenes “pero primero queremos centrar el gobiernu nuevu”

|
Asturianistes por Bimenes

Asturianistes por Bimenes foi la gran allegría del asturianismu’l pasáu 26-M al consiguir la mayoría absoluta nel conceyu yerbatu. Aitor García Corte va repetir al frente del gobiernu, al que va incorporar al edil d’IX-IAS “pa sumar”, y nun escarta esportar la marca ‘Asturianistes’ fuera de Bimenes.

“Tamos ablucaos col resultáu. El llunes depués de les eleiciones tuvi que marchar a media mañana del ayuntamientu de los nervios, mayores que nos díes previos o’l propiu domingu”, rellata cola so sinceridá habitual García Corte. La ciudadanía de Bimenes respondió al llabor fechu pol alcalde del Partíu Asturianista (PAS) y el so equipu de gobiernu con Izquierda Xunida (IX) y Xente Yerbato nestos cuatro años dando-y la mayoría absoluta, doblando representación como Asturianistes por Bimenes rexistrando 6 (56,36 por cientu de los votos) por 2 del PSOE y 1 d’IX, conceyal ésti últimu que va siguir nel equipu de gobiernu tres la invitación fecha pol primer edil.

“Fixímoslo lo meyor que pudimos y más qu’una valoración del nuesu trabayu, entiendo la mayoría absoluta como una esixencia mayor hacia nosotros por parte de los yerbatos”, apunta García Corte, qu’esplica la incorporación d’IX-IAS al equipu de gobiernu “porque tuvo con nosotros trabayando too esti tiempu. La política tien que ser pa sumar, son bona xente  y una cabeza más pa pensar siempre vien bien”.

Sobre los oxetivos pa los cuatros años vinientes, l’alcalde tienlo bien nidio: “quitar la deuda”, que cifra nunos 200.000 euros tres comenzar la llexislatura anterior con 900.000. Será nesi momentu cuando’l Conceyu pueda tener más maniobra pa “invertir na xente y les sos necesidaes”, con una idea fixa na mente, esto ye, “facer los sitios pa poder vivir nellos” y frenar la despoblación.

Entrugáu sobre la posibilidá de que la esperiencia de Bimenes pueda dar el saltu a otros conceyos, García Corte nun dulda en responder que “la idea ye esportala, pero primero queremos centrar el gobienu nuevu y la presidencia de la Mancomunidá de la ‘Comarca de la Sidra’, que nos toca agora”. “Asturianistes nun ye una agrupación d’eleutores, sinón que ta rexistrada como partíu políticu y podría llevase a otros conceyos o a la Xunta Xeneral, pero pa ello queremos tar mui seguros enantes de dar cualquier pasu. Queremos un asturianismu seriu, que tenga pesu”, afirma darréu.

Conceyales asturianistes d’otros partíos

Amás de Bimenes, otros conceyos asturianos van contar con ediles asturianistes. Compromisu por Ḷḷena, que foi en coalición con IX algamando tamién mayoría absoluta, caltién l’acta de José Agripino Pérez Acebal y suma a David Suárez 'Cai', que yá fora anteriormente conceyal de Cultura.

En Noreña, mentes, Conceyu Abiertu por Noreña consiguió representación per tercer llexislatura siguida, anque perdió un conceyal con respeuto a l’anterior. Pablo Pérez va ser una vegada más l’edil nacionalista na Casa Conceyu.

En Xixón, Yolanda González Huergo, candidata a l’alcaldía por Podemos-EQUO, que llegó a la formación morada procedente de Compromisu por Asturies, va liderar el grupu municipal d'esta coalición.

Na semeya, García Corte, de verde, xunto col restu de miembros de la candidatura d'Asturianistes por Bimenes.

Contador Estadistiques