“Asturies pierde al so meyor músicu; tenía un nivel interpretativu mui altu y un gustu esquisitu”, afirma Ambás

|
Tuenda

Deciséis años de trabayu coldu con coldu en Tuenda crearon una fuerte amistá ente Elías García y Xosé Antón Fernández ‘Ambás’. El cantante, mui afeutáu pola muerte del so compañeru –“Asturies pierde al so meyor músicu y yo pierdo a un hermanu” –, destaca’l nivel interpretativu y el “gustu esquisitu” del músicu.

“Elías significó too y tolos que tamos faciendo música tradicional somos un poco los sos fíos, discípulos del so trabayu”, apunta Ambás, qu’empondera “la so capacidá pa ver, refacer, reellaborar, trabayar y evolucionar la nuesa música tradicional”.  “Amás foi la persona que traxo’l bouzouki a Asturies de les islles, convitiéndose nel meyor intérprete d’esi instrumentu d’Europa y siendo clave pa qu’equí tuviéramos a dalgunos de los meyores, como Igor y Rubén Bada. Tenía un gustu interpretativu mui altu y un gustu esquisitu”, añade.

Igor foi precisamente’l que propunxo a Ambás, García y Pepín de Muñalén que s’axuntaran hai agora 16 años pa trabayar la música de raigañu, provocando’l nacimientu de Tuenda. “Yo llegaba con materiales nuevos y mientres sonaba la voz d’aquella paisana de 90 años, Elías yá taba metiendo acordes. Tenía una gran capacidá de ver, de sacar una melodía cada día d’una gran riqueza, al igual que Pepín. Lo que facía yera siempre d’una gran guapura”, recuerda.

“Pues tocar 50 años con una persona y nun ser amigos. Nosotros trés empatizamos a otru nivel. Amás, yera un home gran conocedor de la naturaleza, un ornitólogu espertu. Los viaxes con Tuenda, como’l que fiximos de 15 díes per Bretaña, yeren d’una intensidá, d’un nivel d’harmonía insuperable… Asturies pierde al so meyor músicu y yo a un hermanu”, asegura Ambás que, tres llamentar lo que dexamos ensin disfrutar del so trabayu pola premura de la so muerte, razona que “Elías dexa muncho semao, hasta carbayos”.

Na semeya, d'izquierda a derecha, Pepín de Muñalén, Ambás y Elías García.

Contador Estadistiques