Asturies prepárase pa la Nueche d’Ánimes

|
Asturies prepárase pa la Nueche d’Ánimes

El xueves ye la Nueche d’Ánimes, una xornada mui presente na nuesa tradición anque anguaño contaminada pola so versión estauxunidense: Halloween. Pa esta fecha hai previstes delles actividaes nel país alredor d’esta folixa de raigón celta na que los espíritus de los muertos tornen al mundu de los mortales.

El Samhain o Nueche d’Ánimes, como se conoz n’Asturies, ye l’añu nuevu celta; el pasu del branu al iviernu, cuando la escuridá gana a la lluz. Poro trátase d’una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos.

Son munchos los rituales que se faen esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, que se solíen colocar nos cruces de camín nel pasáu. Pa conocer un poco más d’esta tradición recordamos esta crónica de la charra ‘El Día Difuntos na tradición asturiana’, entamada pola Lliga Celta d’Asturies, que punxo Alberto Álvarez Peña

¿Cómo celebres tu la Nueche d’Ánimes? Nesti reportaxe de ‘A la Gueta los Suaños’ tamién pues garrar delles idees.

Otra manera, n’Asturies.com proponémoste delles actividaes pa la Nueche d'Ánimes y estos díes:

  • Dende’l sábadu’l xixonés Xardín Botánicu Atlánticu vien entamando per octavu añu consecutivu delles actividaes baxo’l nome de ‘Calabaces y Calaveres’, iniciativa dedicada a les tradiciones al rodiu’l Día Difuntos, con un ésitu grande de públicu, como amuesa que se suelan esocar les entraes pa tolos talleres infantiles y actividaes. Tienen especial ésitu les sesiones Lleendes Asturianes de Difuntos previstes pa güei y los díes 1, 2 y 3 de payares, con un preciu de 1 euru (imprescindible inscripción previa), o visitar la esposición de calabaces del Botánicu.
  • Tamién en Xixón, onde les piscines d’El Llano, l’Asociación Sociocultural La Serena celebra Samhain dende xueves al domingu. La folixa va principiar a les 13 hores con una sesión vermú, pa entamar pintacares, talleres y actividaes pa la reciella pela tarde. A les 21.30 hores va celebrase una ceremonia de Nueche d’Ánimes, a la que va siguir la actuación del grupu Assia y del DJ David Dee. El programa esti añu amplíase hasta’l domingu, con verbenes el vienres y el sábadu con Tekila y Pasito Show, de manera respeutiva.
  • Mieres vien apostando dende va un tiempu pola celebración de Samhain baxo’l lema ‘Nun ye Halloween, ye Samaín’ con actividaes dende xueves hasta’l domingu centraes na plaza El Requexu. Un concursu de disfraces ‘Desfile de La Güestia’ va abrir la folixa a les 17.30 hores na Biblioteca de Mieres, con pasucais hasta El Requexu, llugar que va decorase a les 19.30 hores mientres la reciella bailla cola discoteca móvil y los adultos esperen pa siguir la fiesta más entrada la nueche.
  • En Lluanco va entamase’l V Concursu de Calabaces a les 18 hores nel parque Zapardel, que tien como oxetivu averar esta tradición a la xente mozo y evitar la desapaición del so cultivu. L’actividá va comenzar con un amagüestu, mentes que ta prevista tamién una esfoyaza. Esti añu amplíase la programación con artesanía en direuto y canción asturiana.
  • Corvera súmase a esta celebración entamando per primer vegada, xunto al comerciu y la hostelería local, asociaciones y comunidá educativa, una programación pa la Nueche d’Ánimes. Ésta comienza mañana con talleres nes escueles sobre esta festividá y cuentacuentos de mieu y va tener so mayor actividá’l xueves, cuando se va organizar un desfile d’ánimes peles cais y una casa del terror.
  • El Llar La Llegra, n'Uviéu, entama pal vienres una conferencia d'Alberto Álvarez Peña, entitulada 'Mitos y lleendes al rodiu Difuntos asturianos', sobre les tradiciones asturianes pa estos díes. Va ser a les 19.30 hores, pa celebrar depués un alderique y, dende les 21 hores, una folixa con cena 'de traxe'.
Contador Estadistiques