Navidá 2019
Ente’l 25 d’avientu y el 6 de xineru celébrase la Navidá, un tiempu que de xuru te presta porque, amás de les vacaciones escolares y los regalos que se reciben nestes feches, ye un momentu de reunión familiar. Pero, ¿qué se celebra en Navidá? Los católicos y otros cristianos festexen la fecha de nacencia de Xesús, anque nun hai certeza de que fora nesa fecha. La teoría más estendida ye que la Ilesia aprovechara’l solsticiu d’iviernu que por estes feches celebraben munches cultures paganes cola fin d’adaptar esti ritu al cristianismu.
La cena de Nuechebona
La Navidá principia en Nuechebona, cola celebración d’una cena familiar. Tradicionalmente, nella tenía un papel importante la carne, sobre manera la gochu tres la celebración de los samartinos. Tamién solía preparase nes cases asturianes corderu, carne de caza o pescao de temporada nel casu de les zones de mariña.
Los postres tradicionales asturianos pa esta nueche son les casadielles o bollines, feches con nuez picao y masa dulce de fariña de trigu, boroña, o escanda. Tamién tien presencia la compota mazana, el quesu d'almendra, el lleche cuayao o les castañes amagostaes, ente otros. El turrón trátase d’una llambionada más reciente.
El nataliegu
Na xornada de Nuechebona tenía un papel importante’l nataliegu, tamién nomáu leñu o troncu de Navidá. Esta tradición consiste n’echar al fueu del llar un tueru de madera esti día, xeneralmente de carbayu, al entender que los sos restos sirven pa favorecer la fertilidá de la casa y del ganáu, y como defensa énte’l mal.
Les cenices del tueru recuéyense'l Día de Navidá tres amburar tola nueche y guardábense hasta'l Nadal siguiente. En dalgunes cases, dexábase como base pa otros troncos pa facer el fueu del añu nuevu qu'entamaba.
Ramu de Navida
De tradición asturlleonesa, ye un motivu navidiegu que se ta tratando de recuperar nos años últimos. Consiste nuna estructura de madera de forma triangular na so parte superior, onde se coloquen doce veles, ún por cada mes del añu. El ramu, como se denomina, adórnase teles, lazos o motivos distintos; tamién con dulces como rosquilles. Nel so orixe, previsiblemente precristianu, utilizábense árboles pa la so decoración, sobre manera'l carbayu.
Personaxes navidiegos
L’Anguleru ye un personaxe navidiegu que pasa tol añu nel mar de los Sargazos curiando de les anguiles y les angules. Cuando s’avera la Navidá, garra rumbu a Asturies col so barcu pa pescar angula en Nuechebona, vendela, y coles perres que saque, mercar regalos a tolos neños y neñes asturianos, qu’entrega esa mesma nueche. L’Anguleru vien en Navidá porque ye época d’angula y entra n’Asturies pel ríu Nalón, onde los guaḥes de L’Arena salen tolos años a recibilu. Darréu, esti personaxe percuerre tolos llugares d’Asturies onde hai agua en busca d’angula. Si dexes un gorru de llana en Nuechebona baxo l’árbol de Navidá y dalgo de comer y beber pa que pueda reponer fuercies, a la mañana siguiente vas poder atopar dalgún de los regalos que punxeres na carta a los llendadores del ríu, lo sos ayudantes, nesi mesmu llugar.
Cualquier pue ser llendador del ríu: homes y muyeres, neños y neñes, que s'encarguen de la proteición de los nuesos calces mientre tol añu, faciendo llabores de cuidáu, llimpieza y repoblación de les especies que viven nos ríos asturiano. Un trabayu nel que tamién pues collaborar tu. Si yes un bon llendador del ríu pues llegar a ser col tiempu Maestru Llendador, un títulu que te da'l privilexu de collaborar con L'Anguleru en Nuechebona.
Xunto con L'Anguleru, topamos n'Asturies otros personaxes propios como El Faroleru y otros de fuera como Papa Noel, de tradición nórdica pero que vien ganando munchos collacios nos años últimos n'Asturies. Dambos reparten regalos el Día de Navidá.
Regalos
El fechu de dar regalos na Navidá ye dalgo que vien d’atrás, anque enantes los neños y neñes nun recibíen xuguetes, como agora. Hai décades, los regalos consistíen en dulces que se daben p’Añu Nuevu. Col tiempu, la tradición camudó pola influencia de la Ilesia y pasaron a entregase presentes pal día 25 d’avientu y pal 6 de xineru, Día de Reis.
Villancicos
Son cantares que s’entonen por estes feches y que tienen lletres que falen de la Navidá y de tolos sos iconos. Son curtios y con estribillu, y s’intepreten per estes feches. Nun pueden faltar nes actividaes de la escuela y nes celebraciones familiares. Nesti especial ufrímoste una seleición de villancicos asturianos pa que puedas cantalos estos díes na escuela colos tos compañeros y en casa cola to familia.
Aguilandos o mazcaraes d’iviernu
Denominábense asina a los grupos de mozos que percorríen el pueblu pidiendo l’aguilando per toles cases. Los vecinos esperaben la so llegada con comida, dulces y oruxu, yá que si nun paraben creíen que tendríen mala suerte mientres tol añu. Estos grupos diben amazcaritaos, d’ehí’l nome de mazcaraes d’iviernu, y según el sitiu salíen en dalgún de los díes señalaes d’estes feches: Nuechebona, Navidá, Añu Nuevu y Reis.
Los personaxes de la mazcarada representen la lluz –nomaos tamién los guapos– y la escuridá. Éstos suelen ser fixos y simbolicen fuercies de la naturaleza; asina, atopamos, tanto n’Asturies como n’otros llugares, a una vieya (l’iviernu) y a un osu (señor de les viesques) o un diablu, ente otros. Pese a que munches se perdieren, l’esfuerciu de dellos coleutivos y persones permitieron la recuperación de dalgunes. Asina, anguaño caltiénense Los Sidros y La Comedia, de Valdesoto; El Guirria de Ponga, en San Xuan de Beleño; Os Reises del Valledor (Ayande); Os Reises de Tormaleo (Ibias); Os Aguilandeiros de Xedré (Cangas del Narcea); Los Aguilanderos de La Puela Ayande; y los Guilandeiros de Tinéu, yá en febreru. Nel 2014 súmase a esta llista los Aguilandeiros de San Xuan de Villapañada (Grau) tres 70 años de parón.
Esta Navidá pues disfrutar de les siguentes mazcaraes nes feches siguientes: el 23 d'avientu, los Aguilandeiros de San Xuan de Villapañada, el 23 d'avientu; el 29 d'avientu, Os Reises del Valledor; el 1 de xineru, El Guirria; y el 7 de xineru, Os Reises de Tormaleo.
Reis
El 6 de xineru ye Reis, día nel que fina la Navidá y que conmemora’l momentu que recueye la Biblia nel que trés reis magos (nomaos popularmente Melchor, Gaspar y Baltasar) entregaron al neñu Xesús oru, inciensu y mirra. Güei nos países católicos ye una xornada de regalos que sigue al día 5 de xineru, cuando na to ciudá o pueblu se celebra la cabalgata. Esta celebración, sicasí, tien un orixe anterior a la estendida pol cristianismu, yá que la cabalgata nun dexa de ser una gran mazcarada.
¿Yá ties preparada la to carta a los Reis Magos? La Oficina de Normalización Llingüística de Xixón ayúdate a facerla n'asturianu. Pa ello namáí has de calcar equí. Si la quies de manera física, ponte en contautu con esti serviciu de normalización llingüística y ehí t'esplicarán cómo consiguila.
Pa más información pues consultar el nuesu espaciu ‘Ye tiempu de… Navidá’.