El texu
El texu ye un árbol, pero non un árbol cualquiera pa munches cultures, como ye’l casu de l’asturiana. De fueya perenne y perverde que tien una madera mui duro, cuenta col nome científicu de taxus baccata, pue llegar a midir hasta 20 metros y yera sagráu pa los ástures.
Fuertes y llonxevos, dalgunos son milenarios, polo que siempre tuvieron un simbolismu especial. Ta venceyáu a la vida, pero tamién a la muerte, al ser venenosu, simbolizando’l pasu al otru mundu.
Texu del Molín de Pra (Nava)
Son munchos los ritos que los pueblos de cultura celta emplegaben alredor de los texos, de los que dalgunos se caltienen anguaño n’Asturies, como dexar una caña de texu pa San Xuan na ventana de l’amada o a los muertos nel cementeriu pal Día de Difuntos. Tamién yera’l llugar onde los asturianos celebraron mientres sieglos el Conceyu Abiertu, modelu asambleariu de xestión y de toma de decisiones comunes.
Cola llegada del cristianismu, la Ilesia adaptó les creencies, rituales y costumes precristianes, y el texu nun foi una esceición. Asina, les capielles, ermites y cementerios de los pueblos comenzaron a construyise al llau d’estos árboles, que nunca perdieron simbolismu.
Frutu del texu.
La espresión asturiana ‘como un texu’ referida a una persona quier dicir qu’ésta tien fuercia y bona salú.
N’Asturies hai anguaño munchos texos, anque dalgunos tán en pelligru pola so vieyera y pol afán constructivu del home. Los más importantes tán protexíos baxo la declaración de Monumentu Natural, figura qu’asegura que les actividaes a realizar na zona nun puedan afeutar al árbol.
- ¿Cuáles son les cauterístiques principales del texu?
- ¿Por qué ye importe esti árbol na nuesa cultura?
- ¿Qué ye’l Conceyu Abiertu?
- ¿Conoces dalgún texu singular? ¿Cuál?
